為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 09 月 13 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

復刻那些年

稱得上「那些年」,就必定令人回味,要復刻集體回憶,實在有一定難度。但係一眾音樂人決心向難度挑戰,喺九月下旬公演嘅音樂劇《尋找快樂時代》中,大唱八十年代膾炙人口嘅金曲,同時兼顧演戲,誠意同心思都非常可嘉。

今次「Paco巨星飯堂」,就邀請有份參演嘅KB(李健宏)、Kolor嘅Sammy(蘇浩才)、Mr.嘅Alan(布志綸)、RubberBand嘅阿偉(李兆偉),加上兩位女將鍾達茵(Pam)同劉亭君(Ivy),去到位於尖沙咀嘅「胡爐」,品嘗特色火鍋,再暢談佢哋藉音樂劇嘅Crossover交流。

我帶阿偉、Alan、Sammy、Ivy、KB同阿Pam,去到位於尖沙咀嘅「胡爐」,一邊品嘗特色火鍋,一邊暢談佢哋嘅音樂劇《尋找快樂時代》。

 

集各Band大成

LMF、RubberBand、Mr.同Kolor,都係本地獨當一面嘅樂隊,今次嘅音樂劇,就集合各band成員,加上唱和音嘅阿Pam,音樂方面真係唔需要擔心!演戲方面就有Ivy呢位演藝學院畢業嘅實力派,加上歐陽妙芝等成員,可謂質素同誠意兼備。

KB先解說故事:「今次係一個跨時代嘅古仔,由八十年代嘅酒廊文化講起,到九十年代嘅卡拉OK,再講o依家嘅本地音樂,當係香港嘅寫照都好啱。」
Alan補充:「KB、阿偉、Sammy同阿Pam都係八十年代嗰part嘅酒廊band友,而我就係現代嗰part嘅代表,有好多戲要演,我哋都好鍾意個故事,因為都係講香港嘅音樂,所以覺得特別好玩。」

Sammy就表示:「呢個人腳真係約都冇咁齊,每個都嚟自唔同嘅band,夾起嚟會有好多火花。而我哋一邊玩音樂一邊要兼顧演戲,其實係一個挑戰嚟o架!」

故事由八十年代講到現代,藉酒廊文化睇香港音樂嘅轉變,係誠意之作。

 

冬瓜花膠雞翅鍋($348),湯底係煲足四小時嘅雞湯,鮮甜味美,配上冬瓜就唔怕熱氣!

 

火焰龍蝦海鮮鍋($348),除咗有原隻龍蝦等海鮮,湯底亦係落足料炮製嘅龍蝦湯。

 

香辣法式藍青口鍋($298),係具fusion色彩嘅鍋底,香辣嘅味道,甚有性格。

 

夾出樂火花

音樂劇嘅特色,就係融合音樂同演戲兩種表演藝術,呢方面阿偉對Sammy嘅睇法,大表贊同。「同埋揀歌上都好有心思,有譚校長、張國榮同梅姐等嘅經典金曲之外,好多仲會順應劇情,所以唱起嚟都幫助到我哋去投入角色。我記得有場戲,講Alan諗起KB(二人飾演父子),於是唱咗阿Lam嘅〈追憶〉,佢畀人嘅印象不嬲都好rock,但唱嗰首歌嘅時候就好感性,我睇排戲嗰陣都好感動。」

故事關於酒廊,對同為音樂人、現為和音歌手嘅阿Pam嚟講就感受最深。「我入行接觸音樂,就係因為唱酒廊,不過就未試過要live彈琴,我喺劇入面飾演一個琴師,所以o依家我每日都苦練琴技。」

喺眾多音樂人當中,一向演開音樂劇嘅Ivy,可謂演技嘅代表,但佢不忘鼓勵一眾拍檔。「以前演音樂劇,好想排戲都有live band,咁就可以更加激發到自己。今次就終於實現到嘞!而且佢哋個個都咁pro,每次我哋排戲嘅時候,都有呢隊live band,所以氣氛好好。」

一眾參演嘅成員日日落力排練,每次都好似真正開show咁認真。

 

八十年代係本地樂壇嘅黃金時代,

 

老友鬼鬼($68),係炸蝦膠釀油炸鬼,又香又脆,最啱佐酒。

 

頂級牛肉刺身($138),入口即溶,令人一試難忘。

 

活魚刺身(時價)配上加拿大海膽($218/份),鮮味打孖上。

即興組Jumper

六位嘉賓愈講愈起勁,阿偉仲話:「唔係謙虛嘅說話,今次同佢哋咁樣排戲同夾band,真係學到好多嘢!之前一直同自己(樂隊嘅)member夾,大家都習慣咗大家,反而同佢哋夾會有一啲新嘅衝擊。」

Alan亦話:「今次係將我哋(一指阿偉)講咗八年嘅嘢變成真,之前Mr.一直話同RubberBand夾吓,但一直就得個講字。」

Sammy、KB同阿Pam立即起哄,「咁我哋今次就要堅夾番一隊band嘞!」

哈哈哈!佢哋仲話將新band命名為「Jumper」,咁我先預祝佢哋Good Show,再期待一下Jumper日後嘅搞作!

六位嘉賓中,只有Ivy(右三)係科班出身嘅舞台劇演員,其他全部都係音樂人,要同時兼顧唱歌、演戲,對佢哋嚟講可謂一大挑戰。

 

黑松露蟹肉餃($108)係餐廳自家製出品,啖啖蟹香。

 

胡爐牛拼盤(大$488/小$388),包括牛舌心、特級肥牛、極上手切肥牛、日本和牛同牛粒,一碟就可品嘗嚟自世界各地嘅「牛精髓」。

 

餐廳嘅丸類、餃類全為自家製,入口就品嘗到廚師嘅誠意。

 

胡爐
地址:尖沙咀厚福街8號H8 16樓
電話:37021282/37021283