吳鎮宇 鬧市救仔

與囝囝Feynman（費曼）父子檔拍攝內地真人騷後，吳鎮宇自編自導自演的新戲《費曼的夏天》，打正旗號用埋阿仔嗰名，寶貝兒子當然有份參演，實行父子檔吸金。

上周一連四晚，吳鎮宇帶同囝囝Feynman並率領特技人，於旺角鬧市拍攝爆破飛車及開槍戲等大場面，東姑見到現場出動大型吊臂車及多架私家車，認真大陣仗，引得過百人圍觀；特別兩父子出場時進行拍攝，即時引起哄動，場面混亂。身為掌舵人的吳鎮宇，既要保護囝囝安全，又要跟進拍攝，故不時落地指揮大局，期間有途人大叫他『o靚坤』，襯番其大佬風範。對於兒子Feynman的演出，他透露要谷肥囝囝出鏡：「佢肥啲好睇啲，佢有表演慾又鍾意引人笑，但埋位講對白又怕醜。」似乎Feynman有機會成為老竇接班人。

身兼導演及演員的吳鎮宇在旺角鬧市拍戲，不時呼籲圍觀群眾合作。

吳鎮宇與囝囝Feynman父子檔拍戲，有老竇教路，Feynman演出駕輕就熟。

兩父子甫出場，即引起過百人衝上前拍照，嚇窒鎮宇。