超區策略「捉蟲」　涂謹申鄺俊宇孖咇補鑊

立法會選舉仲有兩個星期就舉行，各黨拉票活動如火如荼，但民主黨喺超區嘅部署近日臨時變陣。黨內消息人士透露，佢哋派涂謹申同鄺俊宇分兩張名單出選，原先以為年輕選民會投鄺俊宇，阿涂就吸忠實支持者。

點知最近發現呢個部署「捉蟲」，事關鄺俊宇年輕作家嘅形象唔多受落，選票一面倒流向阿涂，最新港大民調發現阿涂支持度高企喺三成水平，足夠畀兩個候選人入局，可惜阿涂呢張名單無人排佢後面，如果唔配票畀鄺俊宇，就會嘥晒大量選票。

鄺俊宇（左）支持率未符預期，掹車邊都未必入到立法會，要同涂謹申孖住搞宣傳，希望游說支持者過票畀佢。

白鴿黨今屆選舉部署認真不濟，超區一面倒倒票畀阿涂（右二），其他區候選人無乜人氣，支持度亦麻麻。

相反鄺俊宇支持度不足半成，「佢咁樣嘅形勢掹車邊都入唔到，黨內要求阿涂過票畀鄺俊宇。」消息人士話，近排阿涂經常同鄺俊宇行「孖咇」，一齊出席拉票活動。「o依家努力游說黨員支持鄺俊宇，不過又怕谷得太行，阿涂票王夢碎，真係好難做，如果當初佢哋兩個同一張名單出選就唔使煩，都怪我哋高估鄺俊宇嘅吸票能力。」佢指出，上屆泛民超區攞到八十萬票，民主黨佔七成，要爭兩席本來唔難，但今次部署「甩轆」，黨高層都備受批評。

除咗白鴿黨，泛民喺超區嘅選舉戰略可說立立亂，事關超區得五席，但泛民各黨協調失敗，最後有六張名單出選，攬炒早已經係預料中事，喺票源分散情況下，街工梁耀忠只得一成多支持度，勉強入局。但泛民超區原本三席就可能不保，今屆攞到兩席已算大幸。

不過消息人士分析，泛民選情仲有少少變數，「人力上屆杯葛超區，呼籲支持者投白票及廢票，政府最終收到八萬張廢票，今屆人力無叫人杯葛，呢八萬名選民何去何從？足以左右大局。」

相反，今次建制超區部署險中求勝，總共有三張名單出選，包括民建聯李慧琼及周浩鼎兩隊，以及工聯會王國興。港大民意調查顯示，李慧琼支持度僅次於阿涂，有二成七支持，排喺李慧琼名單之後嘅洪連杉有望當選，王國興選情亦未見險阻，建制前後有望獲得三席。

超區其餘名單包括，民協何啟明、公民黨陳琬琛、新同盟關永業。

李慧琼（左三）超區選情理想，甚至有望帶埋排第二嘅洪連杉（左二）入立法會。