現年三十八歲的伍慧珊，是前無綫綠葉演員，經常在古裝劇飾演妹仔、丫環，堪稱御用「妹仔王」。她在一二年離開無綫，之後又拍過港視劇集，直至最近忽然轉行性感接拍電影《幼兒怨》，戲中着透視裙只遮三點而一鳴驚人。

伍慧珊入行二十一年，先後效力過兩間電視台，坦承行內的確有「中間人」向她「問價」，或是暗示不道德的交易，以換取工作機會。不過，她揚言守身如玉力拒誘惑，目前主力內地登台搵真銀，亦只賣性感不賣身，遇上猴擒觀眾時堅守防線，力保不失。

伍慧珊先後效力無綫和港視，日前接受本刊訪問時，大爆曾被「中間人」招手和娛樂圈「潛規則」，而入行二十一年的她仍然浮浮沉沉，如今主力靠內地登台搵食。

電視劇綠葉

現年三十八歲的伍慧珊，在無綫工作了十六年，雖然拍劇不少，但多演綠葉角色。她通常出現在主角身邊，特別是古裝劇中的御用妹仔；不過，就是熟口熟面，卻永遠叫不出她的名字。

伍慧珊堪稱古裝劇的御用妹仔，劇集《醉打金枝》中，跟同期訓練班同學湯盈盈，一齊企後面演關詠荷的丫環。

當年，伍慧珊在無綫多演出綠葉角色，在《秋香怒點唐伯虎》中飾演青樓女子，跟陳豪有對手戲。

直至最近，伍慧珊接拍電影《幼兒怨》才被驚覺多年來「禾稈冚珍珠」，開鏡日同場遇着因上圍豐滿而有「崔Big瓜」稱號的崔碧珈；伍慧珊穿上中間透視裙真空上陣，玲瓏浮凸身材，竟然搶盡風頭。原來，她一直是真人不露相。忽然性感演出似是盡地一煲，伍慧珊解釋說：「唔係刻意安排，咁啱timing就做，就算好多人surprise我呢個年紀先嚟行性感？我又覺得年齡只係數字，最重要係心態。如果想繼續喺呢行發展，應該係時候有啲突破。」

既有樣貌又有身材，身處娛樂圈這個名利場，女仔走「捷徑」應該更容易出頭。伍慧珊偏偏守身如玉，到今日才肯行性感「露兩手」，不道德交易更加免問了，她說：「唔只呢個圈，其他行業都會有，最緊要睇自己肯唔肯，冇人會逼你，你唔行呢條路，就會next搵第二個啦！」伍慧珊坦承曾被人「問價」，亦曾獲邀出席「飯局」，但會見招拆招，她說：「問你價錢問到你都覺得煩，咁咪求其噏個天價囉，有得揀就唔會揀你，咪冇事囉。」

最意想不到是，很多「中間人」原來就在伍慧珊的身邊，她坦言：「遇過幾個都係游說吓你、o氹吓你，或者強調呢個老闆幾好人咁啦，佢哋唔會講明，但暗示到你一定明嘅。」她試過跟朋友到過一個「飯局」，令她感覺既驚訝又大開眼界，她憶述：「食飯嗰陣，會問你奇怪問題，例如三圍幾多，戴咩cup嘅bra；走又叫你唔好自己走，話老闆會車埋你之類。」

伍慧珊預備了一大疊性感照派給現場觀眾，出場前趕忙簽名。

人未到，已有影迷於場外守候，而伍慧珊更有兩名猛男保安護駕到場，非常有排場。

到內地登台時，伍慧珊有如巨星般，獲得夜場的工作人員熱情招待。

電影《幼兒怨》開鏡，伍慧珊（左）穿了一條超性感透視裙，玲瓏浮凸身材表露無遺，搶盡崔碧珈（右）的風頭。