張堅庭：機緣巧合入電影圈

陸叔請來曾兩奪香港電影金像獎最佳編劇的張堅庭（Alfred），暢談他多年來身兼電影導演、編劇、監製、演員各職，曾參與超過八十部電影製作的經歷，及走過香港電影業高山低谷的心路歷程。

張堅庭當年加入港台，最初是做廣播開咪，後來轉到電視部認識很多導演，開始編劇生涯。

陸：Alfred，我知道培幼會同你淵源都幾深，你仲曾經做過佢哋嘅大使。

張：陸叔，我曾經係培幼會助養兒童之一，細個嗰陣我媽媽一個湊三個，生活唔容易，多得佢哋一路以嚟資助我讀書讀到中三、中四，培幼會對我嘅成長意義好重大。仲好記得當時每個月要寫封信畀資助我嘅「契爺」，寫吓平日所發生嘅事，逼住我定期都要去書寫，唔知係咪咁訓練到我寫作嘅能力，諗番都覺得幾得意，哈哈。培幼會其實曾經撤出香港，喺機緣巧合下我哋又重遇，我好感恩可以有咁嘅機會回饋畀培幼會，同有需要嘅兒童。

陸：細細個你已經開始有咁嘅寫作「訓練」，對你似乎好有幫助，咁你又係幾時開始加入港台寫劇本嘅呢？

張：我中六已經喺港台做兼職開咪，寫劇本就大概喺七五年我入咗浸會讀之後。當年我先入港台嘅電台部門、跟住又轉咗去電視部門，咁啱喺嗰陣接觸到啲導演，好多機會都係順理成章咁出現咗，無咩轉折，編劇生涯亦好自然係咁開始，初時寫吓電視劇本、到後期仲寫埋電影劇本。

陸：咁你仲記唔記得第一套寫嘅劇本係咩故事？

張：應該係喺七七，七八年，嗰套劇叫《麻雀仔》，係當年港台半個鐘嘅電視劇，陳玉蓮同任達華做演員，之後就寫咗一連串嘅劇本好似係《執法者》、《獅子山下》等等，我喺浸會畢業無耐，八○年就寫咗我第一個電影劇本《救世者》。

陸：你又要讀書又要花時間寫劇本都唔簡單，咁一般寫一個劇本要幾耐？

張：無定o架，最快嘅一次應該係喺港台寫跑馬地紙盒藏屍案，以一個半個鐘寫三十張原稿紙劇本計算，我只係用咗三個鐘就寫完。嗰次為咗趕交稿，最後一日我先起勢咁寫，諗住交到貨就算，當時仲諗住個劇本一定唔掂，所以交稿時一扔低咗即閃人，點知過兩日監製打電話嚟，話係佢近期睇過最好嘅劇本。

陸：我以為慢功先會出細貨，原來快功都一樣可以有細貨，哈哈。

張：其實個劇本寫得好，真係要多謝當年光頭神探所寫嘅警方報告（Police Report），寫得好清晰，睇到晒佢係點樣由細節去推理行兇嘅每一步，根本成份報告都已經係一個好吸引人嘅故事。好多人會以為「創作」只係創作人先做到，其實我認為人人都可以做創作人，只不過係運用真實嘅材料，透過兇手製造一個又一個嘅危機去營造高潮，咁嘅劇本就已經好好睇！

陸：編劇係你踏入電影界嘅第一步，你又係幾時開始執導嘅呢？

張：我喺八一年第一次執導嗰套戲叫《馬騮過海》，由阿B（鍾鎭濤）同陳友演出，我諗都無咩人會記得，哈哈。

陸：咁你同佢哋兩個都真係合作無間喎，我印象最深刻係佢哋演出嗰套《表錯七日情》。你當時喺香港可以話做得順風順水，點解會捨得擺低事業走去進修呢？

張：可能始終覺得太早入行，自己好似唔夠料，對圈外嘅環境一知半解，想去國外見識吓，而且去美國係我一路以嚟嘅夢想。想當年互聯網未普及，邊可以隨時隨地睇咁多戲。當年因為啱啱買完樓仲要去供樓，所以學費都係問發仔、陳友同李碧華借錢，嗰時一邊讀同電影相關嘅碩士課程，一邊又不時咁去戲院睇戲，依家諗番都重好開心同滿足。不過後嚟八一年中英談判香港政局好似有啲亂，我擔心媽媽、未讀完個碩士就趕着返嚟，真係有啲可惜，好彩返嚟後我拍戲賺到可以還番筆錢畀佢哋咋。

陸：你返到香港之後又開始拍戲嘅生涯？

張：係呀，因為我走之前已經同邵氏簽咗合同，所以返嚟就去幫手寫吓劇本咁，嗰陣拍戲嘅預算唔多，邵氏都係畀機會我試吓，叫我唔好蝕咁多，點知嗰年無蝕仲賺得好勁。

陸：我記得當年曾經出現過好多風靡一時嘅電影，我諗你都應記一功啦？

張：哈哈，當年嘅《一屋兩妻》、《表姐你好嘢》確實幾受歡迎嘅、票房亦都好唔錯添。

陸：我記得有啲戲你仲做埋演員，咁其實香港電影業最風光嘅時期應該係幾時呢？

張：我諗大概係七六至九四年，嗰陣時港產片真係好巴閉，全東南亞好多人係睇住港產片大，我覺得香港之所以可以咁勁係因為嗰陣夠自由，只要你諗得出嘅題材都可以拍，不過九四年打後其他國家嘅電影業就開始慢慢蓬勃，香港亦慢慢失去當初嘅優勢。

陸：聽你咁講，除咗要有機會都仲要識得捉住機會，想有好回報就更加需要運氣同時勢嘅配合，聽落有啲似投資理財咁，哈哈。（待續）