楊瑞麟大老闆上身
楊瑞麟係司儀出身，近年主要客串電視劇，角色多數係西裝友嘅專業人士、上司、大老闆嗰類，好似早排喺無綫電視劇《完美叛侶》中，佢就飾演律師樓老闆「黃Sir」；仲有o依家播緊嘅《愛•回家之八時入席》中，飾演電視台高層「時生」， 都演得好入型入格。
唔知係咪演角色太投入？日前，東姑喺九龍城一間麥記撞到佢，就發現佢平時都好似大老闆上身咁款， 一個人霸兩個位，一路歎住杯咖啡，一路指手劃腳，似係向同枱坐對面嘅女士，猛喺度訓話。而呢位女性朋友，又真係唯唯諾諾猛咁點頭，似係聽晒老闆order，睇嚟楊瑞麟真係有啲霸氣噃。
楊瑞麟一個人霸住兩個位，講到肉緊起上嚟，仲會指手劃腳添。
東姑現場所見，楊瑞麟就似老闆吩咐下屬做嘢咁款，個樣好權威。
