盧宜均自彈自唱第一次

盧宜均（Anna）（見圖）為了首個個人騷忙得不可開交，這位八十後音樂新手，過往集中幕後做音樂，今次與香港小交響樂團合作，在中環藝穗會搞《Beyond Good Music @ The Fringe ：詠。無邪》音樂會，兩場門票賣光光，證明這類音樂知音者還是不少。

忙到出晒煙的Anna話，好緊張這次站在幕前的個人騷，但又覺得好新鮮，「做幕後，演出時工作已完成，但幕前即時見觀眾反應，這也是令我緊張的地方。」

Anna○八年喺美國麻省理工大學畢業，主修語言學及音樂，回流香港後做作曲、編曲等幕後工作。

對於音樂會的賣點，Anna透露有兩部分，「 上半部係我去年幫《 裸「 言泳」無邪》嘅舞台劇寫嘅六首歌，自己好鍾意，已計劃將佢錄起，剛好小交同我講八月有檔期，時間脗合，就拍下心口上，由自己演繹番。上次《 裸「 言泳」無邪》嘅編劇及導演譚孔文也會幫手做說書人，喺歌與歌之間穿插，就首歌畀番啲內容。」而演出下半部分，就是Anna 的音樂成長路，「音樂歷程中好多第一次：第一次寫嘅歌、第一次編嘅歌、第一次賣出嘅歌，仲有細個第一次擁有張學友CD入面最鍾意嘅歌，都會自己演譯一次。」

Anna學古典樂長大，其實佢咩類型嘅音樂都啱，筆者就見過她和母親高靜芝一齊去聽林憶蓮演唱會。她以「多元化」來形容自己的音樂創作，「細個學古典音樂，但亦唱好多流行歌曲，之前陳慧琳演唱會都有做伴唱。」佢形容香港樂迷其實口味很多元化，小交嘅古典音樂會，就好多人捧場，不時一票難求，所以香港音樂土壤其實唔差。