逆行者 陳展鵬
在《城寨英雄》中的「左勾拳」，血氣方剛，有點吊兒郎當，有點衝動；但這天首次接觸的煎Pang陳展鵬，卻頗慢熱、頗cool，不苟言笑，有別於很多甫見面便跟你言談甚歡的藝人。
「其實我都可以齋吹水、好好笑咁o架，但我唔需要，亦都唔想，我可以喺工作上咁做，但我私底下只係想做番我自己，唔想好似幕前咁囉！如果你覺得私底下嘅我悶，咪悶囉，梁朝偉都悶o架！演戲得，咪得囉！」
一個不愛social的人，卻在一個需要social的圈子打滾，大概，這就是宿命。皆因煎Pang從小到大的際遇，都跟他本身很逆向，例如他小時候，本來是個乒乓球香港隊球員，跟戲劇演出完全零關係，但偏偏中學畢業後，就只有演藝學院和無綫藝訓班收了他。「我打緊港隊嗰幾年，冇點睇過電視，好多藝人我唔識，亦都冇諗過要做戲、做演員、明星。」
又例如，他現年明明才只得三十九歲，但過往多年來的角色，卻總是很老成。「好多人知道我只係得廿幾、三十歲時，都會好愕然我原來咁後生。我會好開心演到唔似自己嘅嘢，但亦都唔明點解成日要演啲咁成熟嘅角色，其實我都可以好小子、好開心、好活潑o架！」
根據無綫網站有關《城》劇的角色介紹所寫，「左勾拳」只有廿六歲，算是還了個演小子的心願吧！「真係好好笑，我都就嚟四十，先嚟做番個廿幾歲根據無綫網站有關《城》劇的角色介紹所寫，「左勾拳」只有廿六歲，算是還了個演小子的心願吧！「真係好好笑，我都就嚟四十，先嚟做番個廿幾歲o靚仔，我諗都算係一種磨練啩！哈哈哈！」
說罷，他終於展露了難得的笑容。
香港代表
陳展鵬是家中獨子，父親是消防員，母親是車衣女工，因為嚴厲的家教，又因為小時候愛打乒乓波打到入港隊，讀書時期的他，一直生活得相當有規律。
「我細個打乒乓波打咗八、九年，訓練咗五年。中學嗰陣，返全日制，三點鐘放學之後，就要返體院（香港體育學院）練波，練完波，食埋飯，返到屋企都差唔多九點半、十點，要瞓覺，第二朝又要起身返學；星期六朝早又係練波，星期日就打比賽。
「直至中五會考，由細教到我大嗰位教練要退休，我咪離開埋乒乓球壇囉。其實我可以繼續打香港代表隊，然後做教練、開球館o架，但偏偏我自己都覺得對住張乒乓波枱好悶。」
離開了港隊，會考後，他便跟朋友們玩「大包圍」。「我同打波啲朋友差唔多年紀，大家都唔知放榜成績係點，咪圍威喂乜都報定先囉，中六呀、職業訓練局呀、TVB藝訓班呀、演藝學院呀，乜都報！
「點知除咗中六之外，只係得演藝同藝訓班收咗我。好奇怪o架！我由細到大都冇諗過做明星，我本來係個運動員，但演藝學院interview咗我三次，見埋鍾景輝嗰啲，仲收埋封入學信；然後，連TVB藝訓班都話收我，我好驚o架！」
六、七歲時的煎Pang，西裝骨骨，他形容自己自小性格文靜，但同時熱愛運動。
九四年讀無綫藝訓班後，於多齣劇集中當小角色，那時二十歲還未到，一臉青澀。
龍套歌手
升讀中六、演藝學院和藝訓班，煎Pang最終選擇了藝訓班。「我屋企好草根，到嗰陣我仲要問屋企攞學費讀書，好似唔知點咁，所以讀演藝，一年學費要成萬蚊，根本冇可能！但藝訓班呢，反而仲有錢畀番你喎！不過，我唔知點同我爸爸講。」
如他所料，他這個選擇，還是遭講求紀律的消防員爸爸否決。「我爸爸唔畀，都係驚我會學壞，藝訓班嗰邊就同我爸爸通過一次電話，仲應承咗，如果我讀嘅期間，覺得我學壞，可以cut咗份約——呢樣嘢，本來係唔得o架，所以我咪以為佢哋好似好需要我咁囉，點知入到去，都係讀完之後要跑龍套，不過嗰三年，我係好開心嘅！」
開心，只因那時的他，在無綫跑龍套之餘，更有機會登上大銀幕，在《衝鋒隊怒火街頭》中演陳小春弟弟，又在《新唐山大兄》等十多齣電影中擔當重要角色；甚至兜兜轉轉下，更跟寶麗金唱片公司簽約做歌手，星途似錦，卻敵不過一場金融風暴，以及寶麗金給環球唱片公司收購的命運。
「我嗰陣因為要做歌手，離開咗TVB，好多人幫我，又可以上音樂節目，出得嚟見人就唔衰得，我就將自己嗰十幾廿萬積蓄，擺晒落去買衫，一年搞掂晒我所有嘅錢，仲要爭卡數，點知寶麗金一轉做環球，連我份約都cancel埋，準備出嗰張碟胎死腹中，乜都冇晒，淨係剩番堆衫，有啲仲要未必啱着，瀨晒嘢！」
九十年代中簽了環球前身的寶麗金唱片，曾以《天若有情》look拍宣傳照，「嗰陣好興劉華打扮。」
