為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2016 年 08 月 11 日

爆肌小鮮魚

唔使審,近排無嘢大件事得過巴西里約奧運。雖然治安、衞生問題令賽事睇頭驟減,不過靚仔大隻運動員,永遠有市場。

小鮮肉嘅熱潮,一早已經喺體育界捲起。除咗有英國「跳水金童」戴利(Tom Daley)繼續養眼,國貨亦都成為今屆嘅國際焦點。新一代國產「飛魚王子」寧澤濤,廿三歲卜卜趣,39吋胸肌嘅完美身材加明星級五官,成個package無得挑剔。

今年佢初次代表中國出戰奧運,星期三(10日)同五(12日)都有賽事,有無獎牌命睇個天,不過呢條新晉「小鮮魚」咁多露肉機會,想贏得全球女粉絲個心,應該好穩陣。

外國體壇小鮮肉好多,終於輪到有姿勢有實際,仲有39吋胸肌嘅國產泳壇「小鮮魚」寧澤濤,連外媒都驚為天人,你點可以唔識。

有樣之餘,真係有世界級泳術嗰吓難得,現時仲係亞洲同中國兩項自由式紀錄保持者,有人話佢係「泳壇劉翔」嘅講法非常準確。

話晒都係九十後,稚氣未脫,澤濤有時仲會賣吓萌,係好合理嘅!

 

內外雙贏

嚟自河南嘅寧澤濤,喺香港嘅知名度中規中矩,不過喺中國嘅人氣就爆晒棚,女粉絲數量直逼一線韓星,甚至曾經有「國民老公」嘅稱號。

先唔講佢嘅外貌有幾標緻,淨身高一米九,心口兩部「電視肌」,再加腹肌同人魚線,條件真係夠入娛樂圈有凸。難怪一直不乏雜誌邀請佢拍寫真,更係唔同品牌嘅代言搶手貨。

畢竟游泳運動先係澤濤嘅本業,佢嘅實力源自軍人家庭出身,良好基因加嚴厲家教,寧媽媽仲好早發現澤濤嘅泳術有天份,所以安排當時十四歲嘅佢入海軍游泳隊受訓,擺明有心力谷。

好在寧媽媽嘅心機無白費,兩年前嘅仁川亞運,澤濤助泳隊連奪四金,破埋亞洲紀錄,震驚國際體壇;再喺上年嘅世界游泳錦標賽勇奪男子100米自由泳冠軍,成為42年嚟首個奪冠嘅亞洲人。你話中國泳隊要喺里奧創出佳績,唔靠佢點掂?

老老實實,泳賽嘅嘢,普通女粉絲識條鐵咩,惟有寄望不論留守體壇定轉戰娛樂圈,都有本事贏在起跑線嘅澤濤,keep住曝光,畀大家見多幾面!

各大時尚雜誌梗係唔放過搵佢影寫真嘅機會,靚衫佢就無份着喇,多數係剝衫囉。

 

澤濤深受珠寶、鬚刨等唔同產品品牌歡迎做代言,仲有傳國家隊領導唔like佢「副業」發展得太好,想取消佢參加奧運嘅資格!

 

喺大眾心目中,澤濤形象幾健康,連卡通電影《海底奇兵2》,都搵佢做宣傳大使,但又會唔覺意show事業線嘅可?

 

有咁嘅聲勢,喺各大風雲人物頒獎典禮,佢自然係攞獎常客啦,但真正重點係佢嘅西裝look,有另一番風味。