成功需傅幹 傅家俊
曾幾何時，桌球室被列為龍蛇混雜之地，皆因幾乎所有電影橋段，都以「波樓」為蠱惑仔講數，或警察放蛇拉人的場景，就連香港「桌球一哥」傅家俊（Marco）都承認：「（桌球）個壞形象實在太深入民心，好多人都以為成日有人向我挑機，但現實卻從來無發生過！」
傅家俊多年來在桌球枱上的努力，成功替「篤波」的負面形象洗底。多次奪得世界級英式桌球比賽冠軍的他，贏得「神奇小子」封號，但他卻對此稱號相當抗拒：「都幾核突，我唔鍾意，哈哈！（香港）傳媒好鍾意改啲綽號畀桌球手， 咩『火箭』、『白旋風』……好八十年代feel，拉低咗成個（桌球）運動嘅形象，你睇吓啲打golf、打網球嘅都唔會有花名，我好抗拒，都係叫番我個名好啲！」
的確，「神奇」兩字抹殺了他的努力，傅家俊靠的，全是經驗與技術。
運動員退休年期一向很早，但現年三十八歲的他，早已諗定後路：「桌球手好多都可以打到四十幾歲，我仲可以打，退休後都離唔開桌球，會去做教練，或者去做運動方面嘅PR。」
一Cue定輸贏
離開桌球室，傅家俊拋開運動員的包袱，穿上簡約便服前來拍照，一副從容不迫的樣子，就算手上少了支Cue棍，仍看得出其沉着冷靜的個性，「以前我年少氣盛，無耐性，又有脾氣，容易心浮氣躁，但桌球幫我改善咗性格上嘅不足，因為打波需要高度嘅集中、耐性同內心嘅平靜。」
八十年代初，香港一度很盛行打桌球，當時只有八、九歲的傅家俊，未夠高便學人上桌球室篤波，「香港八十年代好hit打桌球，成日同爸爸去伊館睇比賽，又會一齊去桌球室篤波，嗰時我好矮，埋枱根本唔夠高，叫做試吓攞支Cue嚟玩。到十二歲移民去咗加拿大後，成日睇NBA、睇Michael Jordan，又走去同朋友打籃球，停咗幾年冇打桌球，直到十五、六歲，遇到一個教練，重新再打番桌球。當時進步得好快，興趣就愈來愈大，所以我喺加拿大讀完中學後，十八歲就返咗嚟香港發展，代表香港參加世界性業餘賽事，點知贏咗，就索性轉做職業（桌球手）。」
做得桌球手，比賽「架生」固然相當重要，以為傅家俊定必用歐洲名牌靚Cue比賽，誰知他笑言，好多國際級球手，支Cue只是一百蚊有找。「好多好成功嘅桌球員，佢哋支Cue都好平，唔使一百蚊，唔係愈貴就愈好，啲木愈老先愈靚，我亦都唔會買貴Cue，我嗰支由九七年用到o依家，差唔多廿年了，我好鍾意，搵唔到第二支代替佢。」
桌球Cue的重要程度，可掌控一場賽事的贏輸。「Touch wood！好彩從來都未試過寄失（支Cue），但就會成日遲到囉！例如我聽日比賽，佢後日先寄到，就要借人哋支Cue嚟打，手感唔一樣，會揸唔慣，雖然都有試過贏，但多數都會輸波！」
以世界桌球錦標賽冠軍為目標的他，直言深信有能力成為「世界第一」。
傅家俊於九六年回流香港發展，即贏得全港桌球公開賽冠軍，其後更被稱為「神奇小子」。
實力一四七
現時世界排名十四位、多次奪得世界級桌球比賽冠軍的他，有了知名度，獎金和收入當然相當可觀，他記得第一次打入職業桌球比賽決賽時，便賺了三萬英鎊，足夠他維持兩年生活開銷，不過他坦言，在桌球壇上的成功例子，可以話少之又少。
「啲人成日都話我屋企好有錢，所以先可以去打波，我唔明啲人點解會咁諗！其實當時（玩桌球）好難，政府又冇資助，比賽亦大多集中喺英國，全部機票食宿都要自費，單係機票同酒店都有排計。如果要留幾個月比賽，又要租屋、又要食，消費好高，一年都要二、三十萬，仲有報名費都好貴，最少一百英鎊，世界錦標賽就要七百英磅，差唔多成皮嘢港幣，對新手嚟講真係唔易。如果第一場輸波嘅話，就零收入，所以桌球手成功嘅例子好少，好彩我第一次打職業賽就入到決賽，賺咗筆錢，先維到皮！」
一四年出席香港失明人協進會「一桿過百慈善行動」的他，親自教失明人協進會會長莊陳友打桌球。
