為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 城中人.事 2016 年 08 月 10 日

覆蓋面低 廣告商唔吼 DBC苦撐5年終執笠

曾揚言會投資一億四千萬元發展數碼電台嘅DBC,經營咗五年,原訂下年向政府交中期檢討建議書。但本周一突然宣布交還牌照畀政府,大部分員工亦只做到下月七號,搞掂退牌手續後就正式「摺埋」,一百一十三名員工受影響。今次係繼鳳凰優悅之後,第二間數碼電台唔玩,之後全港就得番新城電台一間私營數碼廣播。

DBC行政總裁羅燦表示,已努力改變,但政府政策唔配合,「政府容許FM電台繼續經營,令市場混亂。」佢話全港有六、七十萬部汽車,多數無數碼廣播設備,相信要十二年淘汰晒,先可以同FM電台競爭。

 

DBC一二年開台,大股東黃楚標(前左一)、李國章(前左二)等人撐場星光熠熠,惜玩咗五年,本周一宣布結業。

 

 

開台無耐,DBC爆發股東爭議,電台一度因財困停播,多名市民集會要求復播。

 

消息一出,唔少員工都好錯愕,喺DBC做咗三年半節目主持嘅劉美娟說:「今日仲同監製開會,傾之後幾個月節目大計,點知一收工就收到同事通知執笠。」

該台前節目主持瑪姬話,「做咗兩年半,每個鐘得兩、三個廣告,仲多數係老闆旗下公司落嘅,好少街外廣告,其餘時間就播節目宣傳廣告,試問一個台咁少廣告,點撐落去?」

DBC一一年獲發牌,除咗鄭經翰和黃楚標兩大股東,仲有夏佳理、李國寶、李國章等猛人入股,預計三年內收支平衡。但翌年啟播後爆發股東爭議,黃楚標等四名股東未按原訂計劃注資五千萬元,電台一度因財困停播三個月。

鄭經翰等人最後與黃楚標達成協議,一三年初復播,黃楚標逐漸購回股份,全資擁有。但經營情況一直未見起色,去年更大幅削減三成人手,停播廿四小時新聞。

政府發嘅三個私營數碼電台牌照,舊年鳳凰優悅率先唔玩,商務及發展局局長蘇錦樑曾表明,會重新檢討市場情況,但言猶在耳,DBC又玩完。中大新聞及傳播學院講師梁麗娟指出,數碼廣播覆蓋率僅七成,聽眾要用百幾蚊買特定收音機先聽到,普及度咁低,廣告商自然唔吼。佢話如今大部分聽眾聽慣模擬廣播電台,數碼電台要搞得起非常難。「政府好被動,無提供技術同政策配合,如果好似推數碼電視咁,要求電台業界全面推行數碼廣播,就唔會搞到依家咁。」

鄭經翰(中)係DBC開台初期嘅台長,但因股東意見不合,佢最後退出咗。