為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 08 月 15 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

龐卓欣:享受自己探索前路

東驥基金管理董事總經理龐寶林(Paul)的女兒龐卓欣(Ada),是在其父事業剛起步的時候出生,這位經父母精心培養而成為多才多藝的港姐,今期順道分享她參選港姐的緣由及其對未來的抱負,Paul亦續與陸叔暢談躍升為星爸的感受。

龐寶林稱會視乎女兒興趣,不會強迫她做接班人; 而龐卓欣現時亦享受摸索前路的感覺, 不希望有框架限住自己。

陸:Paul,你係點將原本同人合作嘅東驥變成只係屬於你自己嘅公司?

龐:陸叔,當時轉新公司之後,佢哋做咗無耐就話唔玩退出咗,我見反正有收咗兩年工資,就諗繼續做下先,點知一做就直到依家喇。

陸:即係話誤打誤撞嘅情況下創業,又誤打誤撞咁繼續守業,你覺得當初創業有無難度呢?

龐:困難o架,當時公司規模細租灣仔一個細單位,我另外請咗兩個以前喺Gartmore嘅得力助手嚟幫手,初時業務都係靠各自人脈逐個聯絡熟客咁,但人哋只係相信Gartmore嘅品牌。開始時好難但都叫做維持到,無耐我哋擴充就搬咗去大新金融中心,仲特登裝修得好豪華,有啲熟客仲開玩笑話我係咪賺咗佢哋好多錢添。

陸:好記得當初離開大福自立門戶,我個心入面都係七上八落咁,既興奮又有啲擔心,依家諗番當年嘅決定其實都幾進取下。

陸:你喺經營東驥嘅時候有無遇過咩阻滯又或者其實好順利?

龐:東驥一直以嚟發展得都算順利,公司之後更發展到有百幾二百人,我嗰時仲將百分之二十五嘅股份賣咗畀法國農業信貸銀行,直到九七年亞洲金融風暴,呢個浪嘅影響力好大,好彩我之前已經折現咗超過百分之八十嘅現金,所以九七年對我嚟講損失有限。

陸:我記得你同妹妹當年有一齊發展?

龐:喺金融風暴後,我同妹妹Scarlett一齊合作擴展多一間公司,專門負責財務計劃資產管理,由於好多客話我哋喺金融風暴嗰時幫到手,佢哋就繼續搵我哋幫手做投資顧問。

陸:你作為基金界嘅老行尊,時下基金界百花齊放嘅環境同你早年做基金管理有無咩分別?

龐:我哋基金管理之所以做得好,主要係靠服務,如果基金管理做得好,客人自然會返嚟搵你。依家唔一樣嘅係基金中介同基金經理要分得好開,而且只可以二擇其一唔可以兼顧。

陸:依家喺市場上有咁多唔同嘅金融產品,基金經理做得專業啲,咁做嘅話無論買方定賣方就大家都安心啲。

陸:Ada,你畢業之後返嚟香港點解唔繼續發展音樂反而走去參選港姐?

欣:陸叔,我知道歌劇喺香港嘅市場始終好細,所以返到嚟我先做咗一年Abercrombie & Fitch嘅店舖經理,主要負責計數同諗下點樣提高每個月嘅銷量,其實剛畢業返嚟嘅時候,已經有親戚提議我去參選,但嗰時我好抗拒。

陸:咁點解做咗一年工又改變主意去參選?

欣:因為喺返到嚟嘅頭一年內我完全無唱歌,但我好想喺唱歌方面繼續發展,當時咁啱遇到港姐報名,我見到有才藝表演嘅環節,諗住可以喺觀眾面前表演唱歌所以就去參選,我報名嗰時都無諗攞名次,只係希望可以令觀眾留下「原來龐卓欣識唱歌」呢個印象,順便睇吓有無其他發展機會。

陸:Ada做咗港姐之後,你哋喺生活上有無咩改變呢?

欣:我覺得參選港姐時所遇到嘅經歷好難得,參選之後我學識咗點去面對傳媒同負面嘅批評。由於參選期間,好多網友喺我嘅社交網站留低啲負面同偏激嘅評論,嗰時我學識調整自己嘅心態,如果唔係會好容易引發情緒嘅問題。

陸:聽你咁講,參選港姐似乎對你係得多過失。你參選仲有無其他嘢可以分享呢?

欣:我覺得網絡欺凌係時下社會好嚴重嘅問題,所以我想通過拍片去分享自己嘅經歷,希望可以幫助到有類似煩惱嘅年輕人。

龐:喺Ada參選前,從來未試過有娛樂記者搵過我,依家就有喇,所以我依家講嘢都小心咗,因為驚會影響到佢,唔可以好似以前喺財經版咁暢所欲言。

陸:Ada你選完之後有無諗過將來發展呢?

欣:選完之後我無簽約,因為我想嘗試自己發展,正如我學完音樂返嚟香港,我一直都想教小朋友或者青少年唱歌,希望透過教育令佢哋認識古典音樂嘅層次,我係一個比較有主見嘅人,唔鍾意跟住框架行,享受自己慢慢摸索前路嘅感覺,希望將來可以走上屬於自己揀嘅路。

陸:Paul,有無打算培養個女做你嘅接班人?

龐:我當然希望佢可以接手,但都要睇佢嘅興趣,佢如果唔鍾意我點都唔可以逼佢。

欣:我都好想跟到爸爸學習,但始終仲需要時間,我曾經喺爸爸公司度做過一年實習,但只係負責做Marketing嘅嘢,至於點揀股票我覺得自己認識未夠深,不過我會努力嘅,哈哈。

陸:我都有個女,佢對金融股票完全無興趣,我覺得作為父親,只要個女健康快樂,佢做咩我都會百分百支持,心態同你爸爸一樣。