為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 08 月 16 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

使徒樂與路

將電視劇拍成電影,事必要「原著」夠受歡迎,再將之進化提昇到另一層次,最近嘅例子就非《使徒行者》莫屬:有固有班底佘詩曼同許紹雄,加上監製文偉鴻初試執導演筒,包保原汁原味。最引人入勝就梗係加入三位重量級型男:古天樂、吳鎮宇同張家輝,更加吸睛!

今次「Paco巨星飯堂」,我就誠邀古仔同文導,去到位於尖沙咀嘅「唐人館」,品嘗特色嘅中國菜式,暢談拍攝電影嘅點滴。

我同古仔、文導演(左至右),去到位於尖沙咀嘅「唐人館」,品嘗特色嘅中國菜式,暢談拍攝電影《使徒行者》嘅點滴。

升級進化版

文導坦言,當初冇諗過有機會拍電影版: 「喺度劇集嘅劇本嗰陣,其實已經有電影版嘅故事雛形。當時度咗一個終極卧底對決嘅橋段,亦都設計咗有第六個卧底嘅出現,但喺三十集嘅劇集入面講唔晒;而且因為有終極卧底,所以唔會再係砵蘭街嘅『社團』對決,而係高級版。

「今次電影版係昇華到描述國際犯罪集團,電視劇根本爭取唔到呢個製作費。當時忍痛要hold起呢段故事,希望有機會再做。今次遇到呢個機會,就可以將佢拍出嚟。」

今次集三大型男於一戲,又遠赴巴西取景,文導亦細說佢對三位嘅感覺:「古仔就唔使講了,我哋以前合作過好多次,私底下係好朋友,佢係一個好有義氣嘅人,我就將佢呢個特質融入戲中。張家輝好勤力,係有充足準備嘅人。佢睇完第一稿竟然主動約我傾,仲做咗好多有關角色嘅pointform(重點)。鎮宇就崇尚喺現場二次創作,佢好鍾意感受現場感覺之後再去演繹,好生活化。佢哋三個嘅火花好勁!」

古仔以「夫婦」去形容佢同家輝喺戲中嘅關係,係兄弟情嘅一種昇華。

水煮魚塊 ($258),水煮汁由正宗四川配料、豆瓣醬及泡辣椒製成,帶出正宗風味,選用新鮮桂花魚,並加入篙筍及紅薯粉,菜式味道刺激辛辣但濃淡得宜,令人回味無窮﹗

琥珀水晶大蝦球 ($328/位),採用約7-8両重虎蝦,蝦身先需以人手去衣、挑筋,令肉保持肉質爽彈,配上以龍蝦頭、鮮蝦、蟹腳等熬煮的龍蝦湯汁,為蝦球提鮮。

江南涼菜拼盤 ( $88起),拼盤包括陳年花雕話梅蝦、醬香一口脆、紅酒鵝肝凍及辣酒汁海蜇頭。陳年花雕話梅蝦係用新鮮九節蝦,以話梅及花雕醃製一晚,酒香四溢;紅酒鵝肝凍嘅鵝肝,以牛奶泡浸三天去除腥味,賣相精緻,口感綿滑。

男人的浪漫

除咗文導,古仔由《中華賭俠》、《黑社會》系列、《保持通話》同《掃毒》,到今次嘅合作,起碼已經係六次碰頭。今次古仔飾演老拍檔嘅左右手,以兄弟情召喚觀眾入場。佢喺戲中更為家輝流下男兒淚,「嗰場戲要喊足感情,仲拍足三日!家輝死呢場戲,我哋都諗咗好耐,研究點去演得好,導演畀咗唔同意見,想帶出我哋濃厚的感情,例如家輝為我兩脇插刀,我又為佢犧牲!我哋喺戲入面,真係好似兩夫婦咁o架!」

戲中有唔少槍戰戲,古仔話最驚險係喺巴西取景嘅時候。「有一日開工,嗰個區真係喺度槍戰緊,喺正我哋隔籬!導演仲話係燒緊炮仗,搵邊個信呀?而開槍確實會令手指幾攰,但動作場面都唔係好辛苦,錢嘉樂(動作導演)都好保護我哋!」

「歡喜哥」許紹雄喺電影中「復活」,令追開電視劇嘅觀眾更易投入。

再次飾演「釘姐」嘅阿佘,同影帝鎮宇大鬥演技。

芋蓉燉鮮奶 ($42),底層係由牛奶、鮮忌廉及蛋白製成嘅燉鮮奶,上層則放上以鮮忌廉製成嘅芋蓉,兩者配合得相當好﹗

黑松野菌滑雞煲飯 ($120/位 ; 2位起),以新鮮無骨雞及菇菌,用黑松露及其他調味料先調味,使整煲飯增添香氣,更美味﹗

賞森巴風情

講到去巴西取景,文導話:「因為巴西係罪惡之城,所以去拍就更加有國際犯罪集團嘅氣勢同感覺。」古仔立即搭話:「我初初以為係因為奧運咋,經過導演解說之後,我哋都覺得係有必要咁做嘅。」

喺巴西嘅日子,古仔就話好欣賞當地嘅飲食文化。「雖然係唔係都係食BBQo架嘞,但係我欣賞佢哋會畀個牌我哋每一個人,一邊紅色一邊綠色,佢哋serve我哋就係咁上菜,你想繼續食就用綠色嗰邊向上;食飽嘞,就反轉紅色嗰邊,佢就唔會再serve你。到你想再食,咪反番綠色嗰邊囉,咁樣唔會浪費食物吖嘛。

「食得多BBQ,我同張家輝都有去食中國餐,咁啱我哋個翻譯,屋企就係開餐館,我哋搭咗兩個幾鐘車去食,都OKo架。」

 

文導(右)同古仔認識多年,後者仲不諱言係因為導演人選,二話不說就接拍電影。

古仔相當有心,飯敍當日同我嘅生日相近,佢就專程買蛋糕為我慶祝,多謝!

蝦子鵝掌扣柚皮 ($138)係一道需要花大量時間處理的懷舊心機菜,柚皮先以小刀去青去除苦澀味,再以6至7成油溫嘅油輕輕一炸。然後加入鵝掌以鮑魚汁扣好,加入蝦籽,鵝掌香軟腍滑,惹味﹗

老北京傳統片皮鴨 (一食$638 / 二食$688),採用平均42天、重3公斤嘅北京田鴨,經過繁複嘅工序逼出味道,利用特訂嘅烤爐製作,烤鴨外皮香脆。

唐人館
地址:尖沙咀廣東道17號海港城港威商場4樓4101號舖
電話:21573148