為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2016 年 08 月 07 日

永遠的三叔 吳孟達

一見吳孟達,我就想叫三叔。

在那個九十年代盛世,周星馳和吳孟達這對黃金組合,既是票房保證,亦是今時今日我們的最「好笑」集體回憶,每人身邊都總有一個,至今仍可以統統記住他們每句騎呢搞笑對白的朋友。

雖說吳孟達在星爺電影中,演出過不知多少個角色,但最印象深刻的,始終還是《賭聖》中的「三叔」。

 

而三叔的「先天性失控症」,當年原來是吳孟達想出來的。

「開拍之前,睇咗套法國片,個主角一畀人掂到就會突然失控,我就諗呢條橋得喎,不如照抄啦!仲即刻諗埋個病名。當時我仲問星仔,知唔知乜嘢係『先天性失控症』,佢答我話知喎,我話你知X咩!我o岩o岩作出嚟o架!」

可惜這麼多年過去,早就忘記那套法國片的名稱。

「我成日想多謝嗰個法國佬o架!封番封利是佢都要啦!」只是訪問過程中叫三叔,吳孟達卻是不會「攬住碌柱」發狂的。

「其實咁多年來,常常都有人叫我『三叔』,跟住就問點解我唔震。我就心諗,你估你係星仔呀?叫三叔我就會震?」今時今日,會叫「星爺」做「星仔」,而冇人會覺得有問題的,恐怕已沒有幾多人。

只是全香港人,都仍然很喜歡叫吳孟達做「三叔」。

方法演技

 

吳孟達神態輕鬆,活動自如,說話中氣十足,完全不似曾經從鬼門關前走過一回。二○一四年三月二十八日,是他無論如何都不會忘記的日子。

「之前在石家莊拍劇已經不太妥,回港後突然喘氣到行都行唔到,呼吸好困難,朋友送我去醫院,一check就要入深切治療部,好彩係剛剛醫得切,即刻開刀做心臟手術。」

回想起來,猶有餘悸。

「我從來冇想過病,亦冇想過話死,當時六十二歲仍然橫衝直撞,真係乜都夠膽。直到場大病就想到喇!個仔得十三、四歲,女就剛剛入大學,我仲有好多事情要安排喎!即刻就立定平安紙。」

現在身體狀況是還可以,病情穩定,好一陣子冇反覆。「o依家仍然不停食藥,去水丸、心臟藥,全部都有副作用,我想減少藥量,遲少少會做一次詳細全身檢查,可以的話就減藥。」

算是康復了,所以才接拍《導火新聞線》電影,飾演一名女兒被強姦殺死,自製炸彈為報女仇,更在電視台綁架一班人,要求與特首對話的角色。

「拍這套戲有好多爆炸場面,身體似乎都頂得住,而且有好多內心戲,個角色就好似被困在籠中的野獸,不斷掙扎、哀號、大叫,有時連對白都講唔清,因為那才是內心的發洩。」

為了這個角色,他更特別去見飾演女兒的演員,事關本來在戲中,「兩父女」根本不用見面。

「我專登去見個女一面,傾幾句,再看看強姦現場的真實環境。」是的,吳孟達是會跟我說史坦尼斯拉夫斯基的方法演技,如何「由外到內,再由內到外」把炸彈狂徒內心表現出來的。

拍《導火新聞線》時,吳孟達剛剛康復不久,拍攝時天氣嚴寒,更要在肚腩位狂塞暖包,變番個大肚腩出來。

賭到跳海

現在的吳孟達,既是演技精湛的演員,同時亦是說話和藹笑容滿面的nice前輩,之不過,他卻說只因為我識得他太遲。

「後生仔,我依家就好相與,你唔知我後生時,真係乜嘢酒色財氣樣樣齊,個人衰到直頭我自己都憎自己,賭錢賭到失常性,去到五十幾歲人,至真真正正算係似番個人咋。」經典故事,當然是一對七,在窩打老道酒樓,與七位「債主」講數。

「我七二年入訓練班,仲要交五十蚊學費,畢業後七百蚊一個月。當年就係貪慕虛榮,好鍾意睇陳寶珠、蕭芳芳,覺得自己都可以做明星,所以去報名。初時屋企唔知,因為我係大仔,老竇一直準備叫我幫手做屋企的小小藥材舖,但瞞唔到幾耐,後來老竇食食吓飯,就係電視見到自己個仔,都冇得唔認啦!

在訓練班時與周潤發是同學,兩人當年極之老友,周潤發更常常在他家過夜,甚至:「當年我哋成日一齊去香港仔水塘裸泳o架!」

《楚留香》中胡鐵花一角,讓吳孟達走紅,但也同時走上欠債路。劇中男主角為鄭少秋,其中一位女主角是趙雅芝。