龐寶林：誤打誤撞向難度挑戰

今期陸叔請來東驥基金管理董事總經理龐寶林（Paul）及其港姐女兒龐卓欣（Ada），Paul將會跟大家分享他當初成立公司是「誤打誤撞」，轉行基金界也是機緣巧合，亦兼想向難度挑戰，他女兒Ada從小就被寵愛兼深受父母悉心教導。

陸：Paul，你轉做基金管理前係喺怡和集團做過，咁係咪一畢業就入去做呢？
龐：陸叔，一畢業我係入咗怡和度做實習行政人員，因為我喺中大讀理科（Science），實習完之後就調咗去工業部做產品經理。怡和當時係好大嘅跨國集團，工業部代理全球五百強嘅公司，當年大部分嘅跨國公司唔係做大炮就係做飛機，跟着發展防偽印刷（Security Printing）代印支票簿，之後再發展食物方面、珠寶、電鍍技術以及手表等等嘅生產線。我喺怡和真係學到好多嘢。
陸：當時負責咁多唔同嘅產品，咁你有咩營銷技巧去提高銷量呢？
龐：嗰時同時要兼顧咁多產品都好辛苦，好記得當時有個同事只係逐個客戶打電話去約，我就勤力地將所有產品樣本帶去荃灣「洗樓」，客人嘅回應係「產品好靚，但係好貴」，於是我留喺嗰度睇佢哋點用，然後返去教工人改良，好快就做咗好多大單。
陸：咁你喺怡和仲有無做其他崗位？
龐：我大約做咗兩年幾就調咗去消費品部，消費品部主要係寶礦力阿華田咁，當時寶礦力係我哋自己去日本間廠傾番來嘅。
陸：其實你啱畢業就已經喺一間大公司度做，前途應該係一片光明吖，點解仲想轉行呢？
龐：我見到當時怡富集團（Jardine Fleming）啲人可以每年收二十四個月工資，感覺好似好好，當我正想加入怡富嘅時候，英資Gartmore先搵咗我，佢哋想請一個幫公司代理香港基金嘅人，仲特意送我去英國同歐洲進修咗一年，不過返到嚟就撞正香港股災。

龐寶林當年因覺得金融業有挑戰性，所以離開大集團加入基金界。他培養女兒的方法，同樣是鼓勵她接受不同的挑戰。

陸：你決定加入Gartmore係因為喜歡投資？
龐：我覺得金融行業富挑戰性，點知咁啱遇上股災，之前我哋做慣實業，未試過完全無生意，但係當時就連銀行都無生意，全部都係贖回，惟有諗計轉變策略。當年台灣相對落後亦未有基金，況且台灣銀行嗰邊好歡迎我哋過去，所以就揀咗去台灣發展先。
陸：我之前都喺銀行做過，知道香港銀行喺借貸各方面利潤同回報太好，所以不屑發展財富管理嘅業務，咁後嚟點解你又會離開Gartmore自己創業呢？
龐：佢哋喺股災前收購咗美國一間公司，但喺股災時因資不抵債，母公司就將Gartmore賣出去。新公司想調我去台灣，但我當時已經就嚟結婚當然唔想離開香港，又咁啱有間英國基金公司邀請我合作，更提供兩年薪酬同百分之三十股份，於是我就離開而成立咗東驥。

陸：Ada，你之前有無聽聞過爸爸嘅奮鬥史呢？
欣：陸叔，聽過好多次喇，由細到大爸爸就用佢嘅人生經歷去鼓勵我要不斷努力，細個嘅時候亦會用啲比較得意嘅方法教我理財，好似準備唔同嘅存錢罐畀我，同我講啲錢係將來先可以用，當時其實唔明白點解，慢慢長大後就會明白爸爸嘅用意。
陸：你嘅童年除咗學習理財之外，仲有無畀父母逼住學好多唔同嘅興趣班？
欣：我本來就比較好動，唔太鍾意坐定定去學習，呢方面性格比較似爸爸，爸爸成日都會帶我去打網球、游泳同騎馬，媽咪就會教我跳舞彈琴。媽咪話希望我細個每樣都學吓，到中學時就畀我可以發展自己嘅興趣。

陸：你年紀咁細就要學咁多嘢，喺時間上會點樣分配呢？
欣：好彩我一直都無需要補習，好多時都係靠爸爸媽媽教我，我數學比較差但係爸爸就好好，所以呢方面佢教我好多。我都係去到中學先開始自己安排時間，小學嘅時間表就比較有規律，每日預先安排好學咩嘢。
陸：睇嚟你爸爸媽媽都唔係怪獸家長喎，哈哈。Paul，你當時公司業務屬起步階段，應該用咗好多時間處理公事，咁你同Ada點維繫父女情呢？
龐：以前公司雖然好忙，周末我唔會出去應酬，多數會陪家人或者去做運動，嗰時仲喺錦繡買咗個單位，逢周末我就同屋企人喺嗰度聚會。
欣：陸叔，我係獨生女，爸爸媽媽佢哋一直都好錫我，有好多親戚同我年紀相近嘅，就會經常約佢哋同我一齊玩，培養我嘅社交能力。

陸：Ada，你喺拔萃書院讀中小學，成績應該幾好，點解無揀到留喺本地升學，反而揀咗去美國曼哈頓音樂學院呢？
欣：香港讀書太重視學業成績，自己讀書唔算好叻，我覺得壓力好大，而且一路都覺得香港嘅讀書制度唔係好適合我，所以我中三就已經去咗美國讀寄宿中學。我一直都鍾意唱歌，喺美國讀書時老師又讚過我，覺得適合就去咗曼哈頓音樂學院讀大學。
陸：我認為無嘢比親情重要，亦睇得到你哋兩位父女感情好好。（待續）