「排獨」再叮人　 法律界：覆核難推翻大局

立法會選舉提名期上周五結束，繼香港民族黨陳浩天及民主進步黨楊繼昌被否決提名資格後，截至本周一晚上七時，再有人被撤銷參選資格，包括中出羊子等。部分被拒入閘嘅參選人提出司法覆核及選舉呈請，不過法律界人士指出，有關呈請只能在選舉塵埃落定後提出，整個司法程序動輒三、四年，無助推翻選舉結果，「根據以往案例，推倒選舉結果重選嘅成功案例不多。」

雖然本民前梁天琦等候選人就「確認書」新規定提出司法覆核，惟資深大律師湯家驊提出，被取消資格嘅選參人，要先提出選舉呈請，否則喺選舉期間獲批司法覆核嘅機會不大。然而要提出呈請，需在選舉結果公布後才可提出，預計整個呈請審訊期連同上訴，最終可能長達三、四年，到時新一屆立會當選人都差不多完成任期。

梁天琦已就「確認書」安排提出司法覆核，但法律界人士認為，此舉無助推翻選舉結果。

香港民族黨陳浩天率先被否決選舉提名資格，佢即場撕毀選舉主任嘅書面回覆。

他指出，法庭會考慮申訴人參選的勝算，再決定是否需要重選。「如果勝出機會唔高，獲批重選機會好微。」湯家驊又強調，法官不會單純考慮個人利益是否受損，「整體社會利益及其他參選人嘅利益都會顧及。」

「排獨」新安排激起千重浪，對競爭異常激烈嘅選情，更起了催化作用。湯家驊指出，陳浩天及楊繼昌無法入閘，對整體選情影響不大，「兩人支持度本來就唔高」，但倘若梁天琦出局，可能令激進民主派支持者改投理念相近嘅候選人，如社民連或青年新政，甚或走上街頭抗爭以示不滿。

倘若梁天琦「入閘」不成，青年新政同本民前早前諗出Plan B方案，在提名期最後一日，宣布青年新政梁頌恆唔選新西，改為同o岩o岩「策略性」退出本民前的李東昇合組一張名單，代梁天琦出選新界東，仲同支持者講明「票投梁頌恆」。

選管會陸續核實參選人嘅資格，連日來有多人被剔出局。

梁頌恆成為後備，但黃台仰亦承認，佢與本民前政見有出入，選民未必完全受落。

不過佢哋嘅如意算盤未必打得響，連出席記招嘅本民前發言人黃台仰都承認，梁頌恆政見與本民前有出入，選民未必完全受落。事實上Plan B曝光後，本民前fb專頁不乏反對聲音。有相信是本民前支持者嘅網民留言指：「梁頌恆名單我一定唔會考慮。」有網民亦分析：「梁頌恆加李東昇兩個政治理念及政綱唔同嘅人，放喺同一條隊，係做錯了！」從網民嘅反應見到，梁天琦嘅票未必能過晒畀梁頌恆，本民前嘅「後備方案」成效存疑。

但城大專業持續進修學院學術統籌宋立功相信，未能「入閘」嘅參選人會大打「悲情牌」，幫成功入閘嘅「本土派」候選人造勢，爭取同情票，即使本民前內部和支持者對由梁頌恆代梁天琦出選仍存有分歧，但他相信，多數選民唔太清楚本民前與青年新政，喺路線上嘅差異，所以仍會響應本民前呼籲「票投梁頌恆」。

至於泛民，宋立功形容他們處境非常尷尬，一方面要出來反對選管會決定，但同時要與港獨劃清界線，「因為三十五歲以上、中產人士不支持港獨，卻正是泛民的主要票源。」宋立功分析，若泛民被港獨政團牽住鼻子走，未有清晰交代是否支持「港獨」，有可能流失選票。