為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人熱話 2016 年 07 月 26 日

不捨書情

雖然時代步伐太快,但城中仍有一班人,摒棄用手機看文字,獨愛追尋「書中自有黃金屋」的味道。以下八位名人,各自有他們的書中情,還原基本看世態。

鄧達智 書的啟示

鄧達智博覽群書,家中收藏了過萬本不同種類的書籍。


《The Little Prince》/《穹蒼下》/《Mariano Fortuny》

熱愛看書的時裝設計師鄧達智(William),家中收藏了過萬本不同類型的書籍,「我咩書都鍾意睇,無論係人生哲理、浪漫情懷、名人自傳抑或係詩集,只要我得閒,就會攞出來睇完一次又一次。」而影響他整個時裝和創意工作最重要的牽引者,就是《Mariano Fortuny》自傳。「呢本書係我當年在英國讀Fashion Design時,一個老師送畀我嘅。呢本書除咗令我搵到自己嘅設計風格,仲令我明白時裝設計師唔係我唯一嘅工作,而係可以同一時間做不同範疇嘅工作。Fortuny就係個咁嘅人,既係時裝設計師,亦係一個作家。」

至於《The Little Prince》(小王子),則是一本改變其壞脾氣的書。「呢本書係我一個英國嘅朋友送畀我,我睇完之後,明白自己脾氣唔好,就好似小王子咁,一個人去到另一個地球時咁無助。我開始明白朋友嘅重要性,對人對事都要有平和嘅心態,所以我就慢慢學習改變自己嘅脾氣。」

此外,William還有一本教曉他放眼世界的書籍——《穹蒼下》。「我十六歲時,喺香港買咗呢本書,之後我帶埋去加拿大上高中,從圖片、字裏行間,令少年嘅我可以遊走世界!《穹蒼下》成為我日後旅行嘅導讀,裏面嘅第一句話:『世界是一本美麗的書,但對不讀它的人,幾無用處。』,此書令旅行漸漸變成我另類雄心壯志嘅契機。」

《豐子愷漫畫選繹》是William八十年代尾購買的書籍,當中他印象最深刻,是書中「人散後一鉤新月天如水」這一句。

由費禮所寫的《穹蒼下》,令William對旅遊的熱情,多年不減。

《Mariano Fortuny》是影響他時裝和創意工作最深的書籍。

蔡加讚 宏觀世界

 

蔡加讚覺得生在香港這個國際城市,應該要對近年迅速崛起的「伊斯蘭國」,有多點認識。

 


《The Rise of Islamic State》

蔡加讚大學時期是修讀政治,現身為企業商家,對世界政局依然關心,尤其是被多個西方國家視為主要打擊目標的「伊斯蘭國」,他覺得對近年迅速崛起的「伊斯蘭國」,要有多點認識。「我想向所有關注國際政治形勢同『伊斯蘭國』嘅人推薦《The Rise of Islamic State》呢本書,作者勾劃佢對伊拉克,仲有敘利亞內戰中嘅睇法,睇完之後,會對當下世界亂象有更深刻嘅了解,亦會對『伊斯蘭國』背後嘅來龍去脈有更多認識。

「喺人類嘅歷史上,戰爭嘅時候多,和平嘅日子少,睇完呢本書,令我深深感受到,同當地比較起來,香港係福地,自己有幸生喺香港。」