為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人熱話 2016 年 07 月 23 日

全球群星熱玩 未玩得都要識《Pokémon GO》全攻略

我知,正路嚟講比卡超係唔會喺精靈球出嚟嘅!但係喺近排熱爆全球嘅手機遊戲《Pokémon GO》入面,比卡超可以畀人野生捕獲,證明nothing is impossible啦!

你冇睇開《寵物小精靈》?冇問題,但你一定要識呢個Game!香港未有正式官方版玩?咁點啫,學定嘢打定底你一定唔會Out!全球Hit星名人都搶住玩,點都要跟到實!

Ellen Degeneres 趕集郵

Ellen同太太Portia de Rossi晒幸福啫,都要show埋隻「奇異種子」,顯示自己夠潮,成功呃like。

 

曾昭令羅君兒 葡萄Show

喺截稿前,《Pokémon GO》只可以喺美國、澳洲同二十六個歐洲國家可以下載。人在美國嘅富商曾文豪孻女曾昭令(Adelene),就捕獲到一隻「車厘龜」,仲上載到Instagram同好友分享。當喺香港嘅Bossini始創人羅定邦孫女羅君兒見到,仲超葡萄表示好想玩。等吓啦!

 

係!香港同其他亞洲地區,包括「Pokémon祖國」日本,喺截稿前仲未有得下載《Pokémon GO》(偷雞下載APK檔案或改地區者除外),但係個game咁hit,啲基本嘢你一定要識!呢個懶人包,有資料有攻略,請細心閱讀。

基本嘢

《Pokémon GO》hit成咁,同遊戲主打嘅擴增實境(Augmented Reality,簡稱AR)大有關係。玩家可以喺真實世界野生捕獲精靈,而且有跟現實時間連動嘅關係,所以都有日夜區分,寫實到不得了。至於搵野生精靈呢,就要睇實地圖,搵到精靈所在,透過手機鏡頭,邊度都有可能撞到比卡超。

雖然香港未有得正式下載,但官方版上周喺本地Apple Shop同Google Play Store就閃現過一粒鐘咁大把,好彩download到嘅,地圖一樣load到,仲有PokéStop(藍點)出現添!

PokéStop可以係地標,或者係一啲你諗都諗唔到嘅地方,例如係筲箕灣譚公廟。有傳香港官方版會在本周推出,姑且信住先!

捉精靈

當玩家附近出現精靈,手機就會透過震動通知玩家。精靈會以AR方式出現,此時要撥動操作掟出精靈球,就有機會可以捕捉到。如果動作太慢、掟得唔準嘅話,精靈就有可能閃咗o架嘞!

所以,為咗避免出現冇精靈球嘅情況,玩家就去PokéStop儲吓精靈球,順便睇吓有咩正道具,幫手升呢。PokéStop世界各地都有,連未有得玩嘅香港都有,仲有實境睇o架!

假若閣下冇耐性但有錢,大可學前頁阿John咁,課金後買精靈球同埋其他法寶,咁就咩都變得好easy啦。

預計本周推出嘅「Pokémon GO Plus」,係透過 Bluetooth 與智慧型手機連接,「附近有Pokémon出現」等遊戲情報,都會以閃燈跟震動嚟提醒玩家,即係擺明掠多你一筆。

要提高野生捕獲成功率,就要多啲練習掟精靈球。

 

行多啲

去PokéStop嘅時候,好彩嘅會發現「精靈蛋」。玩家就靠行路孵蛋,加油嘞!

懶人如John Mayer,就會課金買精靈球同其他法寶。

 

勤升呢

搵得多又捉得多精靈,就會提升精靈訓練師嘅等級。訓練師等級提升,就可以遇到更強嘅精靈,喺PokéStop裏面亦可以獲得更好嘅道具。

有機友pro到用航拍打機,快速升呢。