蘇玉華 趕住抱B

蘇玉華（阿蘇）自從劇集《梟雄》之後，都冇乜再接劇，主力演舞台劇，人應該冇咁衝、冇咁趕，可以多啲私人時間，過吓時興嘅「慢活」生活。

不過，早排東姑喺尖沙咀街頭撞到阿蘇，就見佢行色匆匆，步伐相當急促，除咗似同人哋競步之外，仲十足大忙人咁，邊行邊發語音短訊，而等過馬路遇上紅燈，仲見佢一臉焦急嘅樣，認真趕過人去投胎。

後來，東姑終於喺社交網搵到阿蘇咁趕嘅因由，原來嗰晚佢約埋湯盈盈、胡定欣等無綫人食飯gathering，盈盈仲喺網上貼出細女Kassidy畀阿蘇抱抱嘅相，見阿蘇抱B冧笑似母愛泛濫，應該幾鍾意小朋友。可惜，佢同男朋友潘燦良都話明唔諗住生育，咁惟有爭取時間玩人哋個B喇！

過馬路時，阿蘇遇上紅燈，一臉焦急兩頭望，個樣真係好趕時間吓。

阿蘇咁趕原來係約咗湯盈盈班人飯局，席間，佢抱住盈盈細女Kassidy冧晒個樣，母愛相當泛濫。