為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 07 月 25 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

葉劉淑儀:不隨波逐流 不人云亦云

今期陸叔請來原本一心想成為大學教授的新民黨主席葉劉淑儀(Regina),逐一分享她如何放下理想,離開政府以至踏入政壇從政、及擔任公職多年的一連串有趣事件。

陸:可唔可以講下你嘅家庭背景?
葉:爸爸係新加坡華僑,細細個佢就經常新加坡同香港兩邊飛做生意,當時佢喺新加坡嗰邊有一個太太,我媽媽就係香港呢邊嘅太太,我哋無住過屋邨、住喺千呎私樓,都算係中產家庭。
陸:你覺得你嘅家庭背景對你嘅成長同埋依家有無咩影響?
葉:又無喎,其他人都叫我媽媽做劉太,跟一般正常家庭嘅差別唔大,只不過爸爸大部分嘅生意喺新加坡,我哋見面嘅時間相對較少,當年我其實有諗過報讀嗰邊嘅南洋大學。
陸:另外嗰邊嘅家庭成員對你或者你媽媽有無咩特別睇法?
葉:我唔覺有,一路以嚟我哋都係用平常心去生活,反而因為我弟弟喺香港讀書成績唔好,去咗新加坡讀咗幾年中學,我喺香港讀完中學之後就考到入香港大學。
陸:好記得我當年喺香港大學嘅生活點滴,有好多美麗嘅那些年回憶,咁不如講下你嘅那些年又係點吖?
葉:喺大學時期我完全無參加過學生會,又或者當時保釣等國事運動,大學生涯我去得最多嘅地方就係圖書館,當年班入面啲同學認為點都應該有個人坐定定喺度讀書,因為我鍾意讀書,所以大家就揀咗我,我鍾意學古老嘅文化,大學時期我主修英國文學。
陸:你係一級榮譽畢業,咁畢業後係咪即刻去考政府工?
葉:我求學時期從無諗過要入政府,一直都鍾意讀書,好想去英國留學跟住做教授,我心頭幾高,只係想入牛津或者劍橋讀大學。當年一位同樣取得一級榮譽嘅師兄,去咗牛津讀文藝復興年代嘅古老文化,佢話啲同學嘅法文就等於我哋嘅英文,加上佢哋仲有拉丁文、希臘文嘅底子,港生好自然會吃力。結果我嘅申請唔成功,畢業後就去咗大坑道嘅新法書院當英文教師。

當年葉劉在新法教書時,曾被勸要着裙返工,她卻寫信去學校投訴遭侵犯人權,已可見她不隨波逐流的個性。


陸:咁你喺書院教咗幾耐?
葉:我教咗一年就再試申請到英國留學,我老師同我講過,讀「十六世紀」嘅古老文化要求好高,牛津同劍橋應該唔會收,勸我考慮其他學校,於是我就改變申請格拉斯哥大學(University of Glasgow)結果格拉斯哥最快取錄我。
陸:你教新法嗰一年有無咩特別嘅分享?
葉:我當時剛畢業無積蓄、係職場新人,咪着住返大學嘅衫同長褲返工,當時嘅主任就叫一個女同事勸我轉着裙。我本身係一個原則性好強嘅人,我咪寫信投訴佢侵犯我嘅人權,之後佢就唔敢再話我。不過後嚟有次我買咗套裙着返工,仲贏得全班鼓掌,就等於我嘅「掃把頭」梳厭咗想改就自然會改。
陸:其實你同好多人一樣想改嘅時候就自然會改,唔鍾意人哋逼着自己去改嘅道理一樣。講返你喺新法教咩班?
葉:我負責教中五,專門教佢哋考試。當時教英文嘅方法好簡單,因為我諗住只係教一年,就盡自己能力去幫學生,逐張卷用紅墨水圈住錯嘅文法(grammar)改,當時學生幾鍾意我,我走嘅時候仲好多學生歡送我。
陸:聽落有啲似補習天王咁專攻考試相關嘅試題。當年好多人會認為新法係一間學店,成績一般般嘅學生先會去讀,點解你仲會揀去嗰度教書呢?
葉:新法係一間正式學校。嗰時皇仁、華仁書院預科嘅學位唔夠,好多學生於是會去新法或者威靈頓讀書,當中一定有聰明同向上嘅學生,我反而覺得o依家嘅補習社大賣廣告先似學店。
陸:講番你又係幾時考入政府度做嘅呢?
葉:學期最後一年就開始搵工,嗰時香港大學已經無位教書,而且佢哋都唔會開位教十六世紀嘅英文,後來有做政府工嘅師兄建議我考政務主任(AO),仲教埋我要點準備,於是我去報名。我仲去倫敦考咗兩次筆試,之後政府仲寄咗火車票同埋一晚住宿畀我去面試,過咗一段時間就收到一張機票兼通知我成功取錄,當時收到呢個消息真係好開心,未畢業已經飛咗返嚟,畢業論文仲係喺香港寫再寄返學校。
陸:你喺政府工作第一個部門係邊度呢?
葉:係公務員事務科,我負責紀律事宜即係負責炒人,剛入政府嘅時候我糊糊塗塗,喺蘇格蘭返嚟就去中環返工,當時嘅上司係麥高樂,佢好睇得起我,調派我去軍機處,但我當時唔識得睇人情世故,做咗三個月之後無法抵受壓力而辭職。(待續)