蔡思貝短裙冧教練

 一三年港姐亞軍嘅蔡思貝，未入行前，一度活躍於長跑運動圈。早於〇七年，佢就已經拜著名跑步教練吳輝揚為師，更成為其入室弟子。喺一四年嘅香港渣打馬拉松，佢就以個人時間四十八分鐘完成咗十公里；而當年的女子組十公里冠軍係三十六分十四秒，佢嘅成績算不俗。

早排，蔡思貝都有同東姑透露：「教練想我參加番比賽，以前我試過四十四分鐘跑十公里，o依家要練番先，同埋都想推廣多啲長跑係一項好正氣嘅運動。」想以明星效應落力推廣長跑嘅佢，日前就忙裏抽空出席吳師傅嘅五十六歲壽宴。

當晚身穿短裙嘅蔡思貝，盡騷長腿之餘，亦非常落力搞氣氛，令現場一眾嘉賓都情緖高漲。

早於〇七年，蔡思貝就已經拜著名跑步教練吳輝揚為師，兩師徒感情要好，經常相聚。

喺宴會上，蔡思貝就化身紙板人，任影合照唔嬲；而被安排坐主家席嘅佢，既要不時應酬身邊嘅隊友之餘，又要上台講祝賀詞同頒發紀念品，搞到兩頭騰。此外，身穿迷你牛仔短裙嘅佢，活力十足，更儼如歡樂小姐般到台下玩遊戲、派禮物，冧得吳教練笑到見牙唔見眼。查實，成晚壽宴蔡思貝仲忙過師父，唔講仲以為呢日蔡思貝先係主角添。

化身歡樂小姐嘅蔡思貝，走勻全場派禮物，令現場嘅師兄弟都笑逐顏開。

備受TVB力捧嘅蔡思貝，一劇接一劇，儲落唔少粉絲，所以全晚似足紙板人般，不停被要求影合照。

上周五（八日），蔡思貝前往宣傳活動途中，唔好彩第一次遇到撞車，慶幸只係手部畀玻璃鎅損小小，對於將來喺長跑途上繼續馳騁，絕對冇影響。