為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2016 年 07 月 05 日

關慧玲

《東周刊》社長兼總編輯。

紀文鳳意難平

政府日前公布一年一度的授勳名單,今年共有三百一十人獲授勳,原本是件高興事,但有人卻借此大造文章。例如獲頒金紫荊星章的香港大學校委會委員紀文鳳,被個別傳媒影射她是特首梁振英前競選辦副主任,及由於她在港大校委會反對陳文敏出任副校長,才得到「獎賞」。有傳媒更引述立法會議員葉建源話,紀文鳳基於大力支持否決陳文敏的任命而獲授勳。唔知呢段說話係咪葉建源嘅原話,定係被節錄了幾多,單憑有關報道的引述,就覺得對紀文鳳唔多公道。

睇番紀文鳳呢十幾年工作,佢無論在扶腋高危青年、大學教育、慈善公益、扶貧等方面,都出過唔少力。每位特首在任期間,她都有幫港府籌辦多項大型活動,最經典要數九七香港回歸大匯演,記得佢喺自己本書寫過,當時時間緊迫、工作又多,為咗搞好呢個活動搞到血崩;之後○八年全民紅衣迎聖火、○九年無毒一生活動及東亞運動會開幕禮維港海上匯演、一四年「築福香港」扶貧計劃等,都係佢嘅心血,後者更在短短半年搞了七百項活動,讓至少十萬名基層市民受惠。

政務司司長林鄭月娥便曾形容,紀文鳳係政府的「大義工」,讚揚她「對築福香港的投入、籌備和協調活動時的認真及專業,實在令人敬佩。」

上次同紀文鳳傾起,佢介紹筆者去睇無止橋慈善基金,同埋佢推動敦煌文化嘅詳情。至於扶助協青社佢亦好上心,早前協青社搞了齣街舞劇,她親自邀請青年事務委員會主席劉鳴煒表演,令活動成功得到各方關注。

佢今次獲授勳,卻被人與港大副校長風波扯上關係,令身在海外的紀文鳳意難平。據知,在港大風波鬧得熱烘烘之時,她曾與葉建源見面,彼此坦誠交流兩、三小時,佢將自己過去所做嘅社會工作,講晒畀葉建源知。既然係咁,葉建源卻把授勳與否決陳文敏任命拉埋來講,其背後動機令人存疑,亦是以偏概全。

問紀文鳳心情如何?佢話梗係感到委屈啦,好在消息公布當天早上,佢收到某高官嘅祝賀電郵,附上一句「公道自在人心」,才令佢開懷不少。