為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2016 年 06 月 30 日

「超區」候選人唔易做 按樓「撲水」籌經費

選票有價,尤其係三百幾萬選民揀出來嘅五個「超級區議會」議席,由於選民遍布全港,競選經費隨時多達四、五百萬元,夠買層樓。經費貴到嚇死人,唔少疑似候選人為此頭痕,用各種方法籌款,有人準備用「眾籌」方式,向市民借錢;亦有人計劃按樓周轉,更有人出動太太嘅「公積金」,孤注一擲博一舖。

盛傳有意參加「超區」嘅候選人暫時有十幾人,部分人有大政黨支持,水源充足,但亦有唔少來自細黨或獨立人士。面對幾百萬競選經費,未拎夠提名前,先要計計荷包。

新民主同盟關永業話該黨儲備得十幾萬,好難全資資助黨員參選,如果佢參選「超區」就只好自己經費自己籌。佢曾考慮將所住嘅沙田區細單位加按,套現約二百萬元參選,「我仔細老婆嫩,三個小朋友分別歲半至七歲。一旦落選又還唔到錢,變相負債纍纍。」雖然關太支持佢按樓,但問過銀行之後發覺利息好乸利,「分廿年還,利息合共四、五十萬,超貴。」打消念頭後,佢決定向親友集資百多萬,「算應付到基本開支,唔使問銀行借。」

關永業透露,新同盟儲備得十幾萬,黨員參選經費要自己諗辦法。

關永業一度諗過按咗沙田區自住物業,來做競選經費,但計過度過發現利息好高,所以打消念頭。

但民協何啟明直言有樓按都算易搞,「我連樓都無層,想按都按唔到」。他無奈說,議員收入有限,問銀行借一、兩百萬元私人貸款都難,「每張宣傳單張製作成本約五毫,寄晒畀所有目標選民一次都使成一百七十幾萬,邊有咁多錢?惟有多點用網上宣傳。」

已公布參選「超區」嘅沙田區議員陳國強,諗出用「眾籌」方式集資二百五十萬元,「市民捐一千元以上,我會當係借而唔係捐,會留低對方名字、電話同銀行戶口,選唔選到都好,一年後會還錢。」佢現時經營食品進出口生意,年薪二百多萬元,「有能力還,唔使立借據,講個信字。」

個個四圍撲水撲到暈,積極諗緊參選嘅公民黨議員陳琬琛算係好彩,事關同佢結婚兩年嘅太太,義無反顧拎出二百多萬公積金力撐,「佢係醫管局護士,近日轉職去其他醫院,佢拎晒公積金出來支持我參選。」兩公婆咁恩愛,認真羨煞旁人。

陳琬琛有個做護士嘅好老婆,義無反顧拎出二百多萬公積金力撐佢參選。

陳國強向支持者「眾籌」集資,「選唔選到都好,一年後會還錢畀佢哋。我年薪二百多萬元,有能力還。」