古天樂爆杜琪峯怪癖
由杜琪峯（杜Sir）游乃海攜手打造嘅電影《三人行》，將於暑假上映，戲入面有兩大型男古天樂（古仔）同鍾漢良惡鬥連場打餐死，唔少戲分仲係話佢哋打到身負傷勢，兼且損手爛腳。
早排，東姑聽古仔爆杜Sir啲怪癖，原來杜Sir好鍾意撈埋電影化妝師嗰份，尤其係劇情講到某個角色喺戲中受傷，每次需要造假傷時，佢都會好嚴謹，有時仲自己親自郁手造假添。
好似今套戲咁，講古仔手部要包紮，杜Sir就親自監場，連嚿棉花嘅大小都好講究。另一場戲，講鍾漢良面同手流血，佢仲親自落手畫添！鍾漢良大讚杜Sir做事認真，因為佢最知道傷口嘅受傷程度有幾深，所以佢咁一絲不苟都係應該嘅。
杜Sir親自操刀幫鍾漢良畫傷勢，連電影化妝師嗰份都撈埋。
為求有最逼真嘅效果，杜Sir仲要求鍾漢良，剃咗假傷上嘅一邊頭髮。
