聽爸爸的話，不一定要等父親節。

現年七十九歲、坐擁半百億身家的「大名娛樂」老闆林建名，出名風流多女伴，其花邊新聞，更經常出現於社交或娛樂版面上。不過，他在家中卻扮演嚴父的角色，將其父（已故的林百欣）從小就開始灌輸給他的做人道理，統統傳授給子女。

「我對仔女真係好嚴，不過就從來無打過佢哋。我對佢哋讀書要求其實唔高，只要每年唔好留班，唔好曳到要見家長，或者畀人踢出校，咁我就OKo架喇！我有一個座右銘：凡事都要講誠信，應承咗人嘅嘢一定要做得到；工作一定要勤力，呢啲都係我爸爸對我嘅要求，所以我都要佢哋緊記。」

訪問這天，林建名的三名子女也有現身，四人的互動，溫情洋溢。

林建名與子女關係融洽，無所不談，閒時亦愛摸住酒杯底，與他們分享做人的道理。

林建名笑言無論是中菜、西菜、日本菜、法國菜抑或印度菜，只要味道吸引他就愛，故他經常與子女一起到不同的食店，品嘗美食。

享受美食

林建名有兩段婚姻，這天他與第二任妻子林佩嫦誕下的長女林煒珊（Vanessa），及女友誕下的三女林煒珽（Veronica）和獨子林孝信（Howard）齊齊現身。他甚懂善用時間，而且視力仍非常好，等候期間，他把握機會玩手機遊戲Candy Crush自娛，猶如大細路一樣。

問其子女，如何與父親慶祝今個父親節時，大家姐Vanessa率先回答：「o依家林生最enjoy就係食嘢，所以每年父親節，我都負責搵啲新嘅餐廳帶佢去試。舊年，我哋就去咗一間叫Bibo嘅法國餐廳，因為我知道爹哋鍾意欣賞藝術品，而呢間餐廳內又有好多，所以就帶佢去。今年我哋就會去一間新嘅日本餐廳，試吓人稱日本料理中的最高境界omakase（廚師發辦）。」

不過Vanessa就甚少送禮物給父親，「要買嘢畀佢真係好難，因為佢咩都有，如果你買咗佢唔鍾意，佢只會放埋一邊，完全唔會掂。」孻女Veronica即接口和應：「係呀！記得有年，我送咗隻bear bear熊公仔畀佢，我見佢以前成日送公仔畀我，我諗佢應該都鍾意啩，點知佢一啲都唔鍾意，仲求其放埋咗一邊！不過今年我送咗一個馬毛掃畀佢，因為佢話想用嚟掃佢收藏嘅水晶。」

獲女兒送贈合心意的禮物，林建名即臉露滿足笑容說：「雖然唔係咩特別嘢，又唔係好貴，但最緊要係啱用，我就鍾意o架喇！」

每年父親節的慶祝活動，都是由大女林煒珊安排，「爹哋o依家最enjoy食，尤其最愛試新餐廳，就算唔係父親節，只要我知道有新餐廳開，我都會帶佢去試。」

雖然林煒珽表示，小時候最驚父親，但長大後的她，那種「驚」已消失，訪問期間，她更不時以說話來調侃父親，表現出兩父女溫馨相處的一面。

熱愛美食的林建名，早前到西班牙旅遊，品嘗了當地五間米之蓮星級的餐廳，大女林煒珊笑說：「因為食得太多，搞到佢胃痛。」

相聚點滴

人稱大少的林建名，人前笑容滿面，與子女談笑風生。但在子女心目中，父親原來是位嚴父，大女Vanessa說：「細個覺得爹哋好嚴謹，不過佢就唔會打我哋，反而係媽咪打囉。」

Veronica接着說：「我細個都好驚爹哋，因為佢好好中氣，一出聲我哋就震晒。而且細個佢唔畀我哋出夜街，不過到咗中學後期，有時我都唔理佢，照出，哈哈！不過返到屋企就會畀佢鬧幾句囉。」

在旁的林建名聽後，笑笑口說：「女仔去夜街危險吖嘛！我都係擔心佢哋安全啫！」

Veronica續說：「以前我哋每個周末，都會一家人坐遊艇出海，爹哋就玩wakeboard，而我同Howard就要圍住隻船游三十個圈，佢話咁係幫我哋克服對海嘅恐懼，又話係最好嘅一種游水鍛煉。雖然我哋個個游水都算唔錯，但細個有段時間，真係怕咗出海o架！」

為了鍛煉子女的體能，林建名採用「逼功」；對子女的學業要求，他則採取放任的心態。「體能係可以訓練出嚟，但讀唔讀到書，只可以靠佢哋自己，如果佢哋唔係讀書嘅材料，我點逼都逼唔到，所以我只要求佢哋讀書唔好留班、唔好畀人踢出校、唔好要見家長。其實我哋都無咩特別家規，不過自細我就教佢哋，無論對咩人都一定要有誠信、有禮貌同識得尊重人。」

林建名這一套教子女方式，或多或少是源自其父林百欣。「佢都係咁教我哋，做人一定要有誠信，工作一定要勤力，唔好怕蝕底；對員工一定要賞罰分明，出糧一定要準時，總之要做一個好僱主。」