爆肌男 鄭子邦
近年男男女女都興起操練人魚線和馬甲線，最新流行則是進階版的鯊魚線。
姚子羚男友、有「的士邦」之稱的車行太子爺鄭子邦，一向大大隻，上月他搵教練進行了為期四十五日的特訓，苦練出一身子彈肌肉，最吸睛是腹肌兩側的鯊魚線，「辛苦到嘔，第二堂真係嘔咗兩次，不過我無諗過放棄，畀咗錢o架嘛！哈哈！」
操到變大隻佬，唔通為同女友姚子羚結婚?他笑笑口說：「唔會為結婚而操揀，就算我好肥都可以結婚嘅。我好滿意o依家嘅身型，想畀個目標自己，做運動都係一種堅持，mindset好重要，我相信自己無嘢係做唔到。」
鄭子邦用拉力帶操練肩部肌肉，中、上、下和交叉咁拉，每組重複做，每一下要hold住5秒，絕對不容易。
用拉力帶操練二頭肌，令肌肉練得更靚，最重要是不會產生肌肉肥大而不協調的問題。
地獄式操練
上身赤裸，下身穿運動短褲和波鞋的鄭子邦，趁攝影師打燈時，開始做熱身運動，拉筋、引體上升、舉啞鈴等，完全無偷懶，五分鐘已經渾身大汗，褲頭都濕埋，但他依然臉不紅，氣不喘，只是谷到上身的肌肉脹卜卜，「我做一陣（肌肉）就脹晒，做熱身可以做個幾鐘都得。」
他先練臂力，用上拉力度最強度的拉力帶，雙手一下一下地拉，轉眼就拉動三、四十下；然後再做平板支撐的動作，在旁看也戥他辛苦，難得他仍笑笑口說：「女仔唔夠力啦o架，NBA球員都有用呢條拉力帶做肌力訓練．Kenny（關智斌）問我點解咁辛苦都笑得出？唔知點解，辛苦時我係會笑。」
經過四十五天的體力特訓，強大了鄭子邦的體能和內心，他每朝八時便跟教練開始訓練，每次操兩個鐘，由第一、二日操到嘔，至第三日身體開始適應，竟然愈操愈精神，「教練會幫我度身設計運動，頭一星期畀我做多啲hold住嘅動作，好似引體上升、掌上壓，hold五分鐘唔落地，之後嗰星期就做好多帶氧運動，好似舉重、跑步、籃球場掉波，燃燒晒身上嘅脂肪﹔o依家學識點做運動，唔會再做到肌肉痛，辛苦就梗o架啦！我做運動目的喺想身體健康，因為有健康體魄，先至可以兼顧到家庭同工作。」
舉起兩個15磅的啞鈴，3組動作，每次舉30下，舉到青筋都現。
