楊祐寧與彭于晏 大玩HeHe
新戲《寒戰2》嘅卡士認真犀利，除咗有港產嘅周潤發、郭富城、梁家輝三大影帝坐鎮之外，仲有彼岸嘅男神級人馬：彭于晏、 楊祐寧助陣，佢哋一樣來自台灣，同聲同氣，戲外仲稱兄道弟好鬼friend添。
東姑早排喺拍戲現場，咁啱撞正係楊祐寧嘅生日，成班人同佢玩驚喜，突然攞出兩個蛋糕同佢賀壽。現場睇得出彭于晏同楊祐寧真係堅老友，兩個攬晒頭攬晒頸，壽星仔仲反餵彭于晏食蛋糕噃。雖然有啲HeHe feel，但係兩個大男孩兄弟情深，一於話之理。
東姑聽聞，彭于晏對楊祐寧仲照顧有加，戲入面楊祐寧飾演佢嘅同黨，一齊發動驚天陰謀對付警察局長郭富城。因為動作場面靠晒楊祐寧，所以無論身手同身型都要keep到好fit，彭于晏就特別介紹咗自己香港嘅健身教練益兄弟，等楊祐寧拍呢套戲時，可以好似佢拍《激戰》時練到六嚿腹肌。唔怕老友型過自己，搶戲過自己，呢啲先係真正好兄弟！
楊祐寧﹙左﹚生日，壽星仔反過來餵彭于晏﹙右﹚食蛋糕，呢個畫面真係好有HeHe feel。
兩大台灣男神特別friend，彭于晏﹙左﹚上前同楊祐寧﹙右﹚祝壽兼攬攬。
