為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 06 月 28 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

本土Power

創意工業最重視本土新血,所以政府就舉辦「首部劇情電影計劃」,資助電影新力軍,鼓勵本土年輕人。計劃中兩部學生組勝出作品:《點五步》同《一念無明》,其實都有電影界專業人士在陣相助。

今次「Paco巨星飯堂」,就邀請到其中四位本土力量:麥曦茵導演、林耀聲、岑珈其同香港棒球代表隊成員胡子彤(Tony),喺位於天后嘅「A la maison XXL Seafood & Grill」,一邊品嘗地中海式嘅海鮮料理,一邊展現本土電影嘅Power!

今次我帶影壇新勢力阿聲、麥曦茵、Tony及珈其(左至右),去到位於天后嘅「A la maison XXL Seafood & Grill」,一邊品嘗地中海式海鮮料理,一邊暢談兩部值得留意嘅電影:《點五步》同《一念無明》。

電影係政府舉辦嘅「首部劇情電影計劃」勝出作品,以八十年代嘅香港作背景,棒球有喚起熱血嘅作用,所以喺今屆「香港電影節」中,大獲好評。

熱血故事

香港人,梗係要支持香港電影!早前喺香港電影節中放映過嘅《點五步》,即使冇強勁卡士,單憑改編八三年沙田「沙燕隊」,歷史性贏得亞洲少年棒球賽嘅熱血故事,備受讚賞,甚有《狂舞派》之勢。

男主角之一、曾經參演過電影《烈日當空》嘅阿聲解說:「古仔除咗改編自真人真事,當中仲有描寫兩個屋邨仔嘅友情,所以觀眾會容易啲有共鳴。」

阿聲對演戲嘅熱血,都拍得住佢喺戲中嘅角色。「我喺十七歲嘅時候,拍咗《烈日當空》,之後就鍾意咗演戲,但係有理想都要搵食o架!所以我喺呢幾年入面,除咗拍戲之外,做過三、四十份散工賺錢。炒散嘅時間彈性啲,咁我就可以做吓散工拍吓戲,兼顧現實同理想。」

傳統意式凍肉拼盤($338),集九大意式小食於一身,適合三五知己佐酒暢飲。

尼哥斯沙律($235)將新鮮蔬菜及燒吞拿魚嘅味道,混合提升層次。

A la maison海鮮拼盤($998),用上生蠔、麵包蟹、翡翠螺、海蝦、鑽石蜆及藍青口,集合海洋鮮味。

如假包換

一個咁激勵人心嘅故事,既然係以棒球作題材,當中又點會冇一個真正嘅棒球運動員?Tony就係嗰位如假包換嘅棒球手,今年廿三歲嘅佢,十歲就開始打棒球,o依家係香港隊嘅「二游手」(二、三壘間嘅游擊手)。今次粉墨登場,擔演其中一位男主角,Tony話同智叔廖啟智合作,令佢獲益良多。

「智叔係一個好專業又好肯教人嘅前輩,我第一次拍電影,好多嘢都唔識,佢都好有耐性咁教我。」

為咗一眾「沙燕隊」成員,可以將戲中嘅另一主角棒球發揮得最「靚仔」,Tony話:「導演阿發(陳志發)特別安排咗佢哋參加特訓,其實係喺網球場上面學投球同揮棒,培養團隊精神。初初我見到好多演員都唔識,到訓練嘅中後期,佢哋都打得有板有眼。

「最感動係戲入面last嗰場決賽戲,我喺電影節嗰陣睇,都睇到眼濕濕。因為導演係棒球門外漢,但係都拍到我哋比賽嗰陣嘅激情,真係好感動!」

另一位有份演出嘅珈其就話:「今次除咗拍咗一部自己鍾意嘅戲、認識咗棒球呢個運動,我諗另一個得着,係識到一班好兄弟!」

智叔(右)喺呢個改編自真人真事嘅電影入面,飾演Band 5學校校長一角,戲裏戲外都係帶動整體嘅重要角色。

Tony係香港棒球代表隊嘅成員,而佢喺電影中,除咗做自己打棒球,仲同談善言有談情戲份,佢視之為一大挑戰。

麥曦茵執導嘅作品包括《烈日當空》、《前度》等,《一念無明》係佢首次擔任執行監製嘅作品,佢認為係一個嶄新體驗。

一眾年輕電影力量,遇上兩位年輕嘅餐廳老闆(左及右),結果係源源不絕嘅美食交流。

真‧過來人

三位年輕演員講得起勁,令另一部電影嘅執行監製麥曦茵都相當投入,而後者同阿聲、珈其早喺《烈日當空》中合作,所以佢哋感情相當好。舊作係麥曦茵首次執導嘅劇情片,仲令佢成為當時香港最年輕嘅電影導演;新作《一念無明》係佢首次擔任執行監製嘅作品,令佢感受甚深。

「我喺呢部戲嘅導演黃進身上,見到我自己,我同佢一樣都好自我、好有自己嘅諗法,以前有人去幫我執行,今次就到我去幫導演執行。我覺得監製嘅角色係,退後一步為導演去考慮同保護佢,畀佢專心去做自己想做嘅事。」

焗法式香草牛油藍青口($260),更能帶出藍青口嘅鮮香。

原隻龍蝦西班牙海鮮飯($518),惹味!

鹽燒鯛魚($390),魚身外嘅海鹽鎖緊魚肉嘅水份,非常juicy。

龍蝦法式早餐($238),既可品嘗龍蝦嘅鮮甜,又可嘗到和牛嘅美味。

甜品係招牌雪糕窩夫拼盤伴鮮果($98),為飯敍劃上完美句號。

A la maison XXL Seafood & Grill
地址:天后木星街18號F-G鋪
電話:25100123