為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2016 年 06 月 23 日

「乳鴿」大換血 立會選情危機四伏

九月立法會選舉,民主黨備受內憂外患困擾。除咗首次排頭位出選港島嘅許智峯,爆出用區議會津貼派花紅畀助手,差啲無埋出選資格外,參選新界東嘅林卓廷(阿廷)同樣濕滯,消息人士說:「佢嘅能幹服唔到眾,今次排頭位出選,邀請過唔少黨內明日之星排喺佢後面,竟然無人制,卿姐可能焗住排第二位。」據悉,阿廷好唔容易先湊夠七人組成一張名單,本周三將呈交會員大會通過,「有啲人選無人識,人才凋零得咁緊要嗎?」

綜合消息人士嘅料,原來白鴿黨內唔係好多人誠服阿廷,「佢完全無政績,靠黨內高層大佬上位,一入來就做總幹事,依家仲選埋新東,呢區等咗好耐嘅第二梯隊被打尖,梗係唔服氣。」有消息人士透露,阿廷早前邀請有「翻版李英愛」之稱嘅明日之星曾素麗、猛將區鎮樺及鄭則文等人排隊,全部食檸檬。

林卓廷樁腳好弱,選情唔太樂觀。據悉,佢邀請過曾素麗(下圖)排喺名單後面,被對方拒絕。

「乳鴿」出戰立會嘅主帥欠睇頭,諗住裸退嘅何俊仁(前右一)、卿姐(前右二)及單仲偕(前左二)要喺宣傳活動坐鎮。

許智峯爆出用區議會津貼派花紅畀助手,差啲無埋出選資格。

揀無可揀之下,惟有揀政績唔標青嘅黨員排隊,「部分人選唔係區議員,只係社區幹事之類。」

諗住收山嘅卿姐見勢色唔對路都要抬轎,但呢張名單一出,就畀大會打回頭,本周三要再「闖關」。「卿姐應該瀟灑咁退下,而且,成張名單好有拉雜成軍嘅感覺。」消息人士相信,名單能否通過仲係五十五十。

至於大難不死嘅許智峯,消息人士爆料唔搣佢出選資格,唔係中委會信佢嘅解釋,而係形勢所逼,「仲有三個月就選舉,依家先換馬根本趕唔切,夾硬放生佢。」

多名消息人士分析,「乳鴿」黨今屆大換血,但五區接班人嘅質素參差,選情危機四伏,其中以阿廷及許智峯最危。「阿廷喺區議員投票部分壓倒兩位黨內對手,民調及地區支部就輸成條街,無卿姐唔使諗出選。不過,民調同支部都唔撐佢,樁腳好弱。」

許智峯同樣唔夠支持度,消息人士說:「民主黨『南區三寶』羅健熙、柴文瀚、區諾軒因為各種理由棄選,許智峯至冷手執隻熱煎堆。」消息人士歎氣說:「乳鴿黨夠班嘅人成日被高層埋沒,唔夠班嘅就靠擦掂大佬鞋出位,有乜辦法唔令黨員及選民心淡?」