雨僑 天台危企
雨僑（Ava） 本身有畏高，早排佢為咗拍一個MV《大奇蹟日》，名副其實為工作獻身挑戰自己喇！
MV嘅內容就係話一個女仔為情所困，搞到自殘想跳樓，而Ava就化身魔法師去救佢。拍攝現場係一幢唐樓嘅九樓天台，齋係企喺度望落街都會有啲腳仔軟，更何況有一場戲，仲要Ava企上欄河邊扮跳樓，旁觀者睇到都戥佢牙煙，認真難為了Ava。
東姑睇過啲幕後花絮，工作人員為咗令Ava淡定啲，搵咗兩個人喺佢腳邊傍到實，又捉實佢雙腳當安全措施，當然同安全帶完全係兩回事，不過就純粹喺心理上有個安撫作用。
聽聞，Ava喺嗰日拍攝時依然成個人驚到震晒，事後拍完仲猛話：「驚、好驚、真係驚o架！」係咁不停喃嘸，所以，話拍得成呢個MV，都算應咗首歌名，奇蹟嚟o架！
轉個鏡頭，Ava身份就變咗企喺欄河邊，企圖跳樓嗰個，雙腳有兩個工作人員扶到佢實，但佢一樣驚到腳軟。
