逆境小智慧 沈慧林
香港經濟低迷，作為老闆當然要想盡辦法，逆境自强。
現年三十一歲的萬希泉鐘錶老闆沈慧林（William），一一年創立陀飛輪品牌萬希泉（Memorigin），由設計到生產，一切由零開始，一個門外漢硬撼傳統瑞士名錶品牌，就算心知市場已被大集團佔據，他一樣自信滿滿的說：「我啱啱創立『萬希泉』時，好多人都覺得我無得做，因為已經畀三大集團（Richemont、Swatch Group、LVMH）贏晒成個（鐘錶）市 ，就算我標榜係香港品牌，啲人都只會覺得係大陸嘢，但我從來唔需要做No.1，只要爭到一席位，做No.2或No.3已經夠！」
憑藉這個「小智慧」，他成功在逆境中站穩陣腳。
沈慧林指作為「第二代」，壓力相當大：「我係個創業家，但有時都會畀人歸納做『富二代』，好多人都覺得同父母一樣成功係應該嘅，如果唔得，就話你無出息，畀好多說話你聽，好辛苦！」
萬事起頭難
這天，到訪沈慧林位於柴灣工業城的辦公室，首先被帶進參觀展覽廳，內有過千件木雕及大型音樂盒，全是過百年歷史的古董。「爸爸一向好鍾意中華文化，我細個時，阿爺成日用啲木雕同我講（中國傳統）故事，搞到我都好鍾意中國歷史，算係啟發我做手錶嘅第一步！」
其父沈墨寧早年是大學醫科教授，更於杭州投資工廠生產手錶機芯，但沈慧林不行父親舊路，先到美國南加州大學修讀經濟及財經系，後到美國康乃爾大學攻讀經濟學碩士。「以前讀書叻嘅同學，統統都會揀讀醫，貪佢吃香；我以為揀讀經濟實無死，點知遇正雷曼事件，喺美國根本搵唔到工。
「當時只有兩條路揀，一係就讀多個碩士課程避市，一係就去創業。咁啱我寫嘅畢業論文，係研究爸爸間廠啲手錶師傅嘅生產力，同學術水平有無直接關係。咁就意外發現佢哋有陀飛輪技術，呢個技術全世界唔多於三十間廠可以做到，於是我把心一橫，就創立一個陀飛輪品牌。」
為人父母，總望子成龍，尤其兒子讀經濟出身，不是年薪過百萬，也要是個金融才俊，怎料沈慧林卻以門外漢身份冒險創業，其父母自然大力反對。「屋企梗係想我做金融才俊，返工返中環，點會返柴灣呢度？當時我喺香港做iBanker，日日做到凌晨一、兩點，佢哋就覺得我捱唔到苦，搵個藉口唔做，覺得我無出息，又驚我倒錢落海，一鋪清袋，極力反對我創業！」
中學就讀於聖若瑟書院的他（後排左一），自嘲當時是個百分百「宅男」：「以前我好自閉、好怕醜又唔敢講嘢，同o依家好唔同。」
○九年沈慧林於美國康乃爾大學完成經濟學碩士，獲一家人前來祝賀。
一四年雷頒德（右一）與沈慧林（左一）合作，設計「Time Machine」錶款，於K11舉行發布會，並邀請Big Four做剪綵嘉賓。
去年他（左）與公關公司合作，設計iPANDAS熊貓錶款，為李嘉欣創立的JMJ慈善基金籌款，宣揚保育熊貓。
