晶女郎 黃泳霖
周啟邦兒子周國豐﹙Brandon﹚的太太黃泳霖﹙Jenny﹚，愛以水晶布置居室，既有貴氣又不俗套。其家中的大小擺設、餐具以至燈飾，都用上水晶，「我覺得水晶雅緻又唔浮誇，沉實得來又夠靚，如果擺到又金又銀會好誇。」
她愈買愈多，直至兩個仔出世，怕被他們打爛，才開始收手唔買，但轉頭又忍唔到手，並開始向高空發展，飯廳就用上價值八萬元的「白水晶」吊燈，睇得又用得，「我都唔為意，買買吓，原來買咗咁多水晶，哈哈。」
Jenny收藏的水晶，分布在家中不同角落，大部份放在主人房內，「初時都怕小朋友會整爛啲水晶，但有啲一直擺喺個廳度又冇爛過。我買水晶只會睇靚唔靚，唔睇牌子，自己鍾意就ok。」
代代相傳
眼前的水晶，只是Jenny的部份收藏，她還有部份放在娘家，「我自細已經好鍾意水晶，因為爹哋媽咪都好鍾意，屋企有個櫃專放水晶。近幾年生日、或過時過節，佢哋都會送水晶畀我。新居入伙時，佢哋就送咗個大肚佛，希望我哋連生貴子，水晶佛唔老土，愈睇愈靚。」
Jenny新居入伙，父母送上水晶大肚佛，寓意她連生貴子，愈多愈好。
Jenny與Brandon有樣學樣，拍拖和結婚初期，主力買二人所屬的狗、牛生肖水晶，但自從兩個仔出世，就只買虎和龍，「o依家屋企有好多狗、牛、虎、龍，呢四個生肖嘅水晶。」
講到最有紀念價值的水晶，Jenny坦言是父親所送的五個小女孩水晶，她珍藏至今，「記得嗰時十零歲，爹哋買咗五個女仔嘅水晶，話代表我哋五姊妹，一人一個，好有意思，就算有隻爛咗都唔捨得丟。」
Brandon喜歡凶猛的動物，金箔鷹水晶，價值萬多元。
Jenny當年收到好多水晶的結婚禮物，全部都是一雙一對，其中有baccarat紅色愛情鳥水晶，她笑言：「我一定唔會送水晶畀人做結婚禮物，怕人哋收得太多。」
本來一對的baccarat水晶蠟燭檯，Brandon不小心打爛了一隻，自此燭光晚餐就少了一點燭光，約$15,000。
