選美風雲（一）爆房

睇香港小姐選舉，以前，曾經期待。今日，錯過了亦無妨。千載不變，依然強調美貌、智慧與氣質，大不了再離地，選出另一個讀劍橋十優生。新免費電視台分一杯羹，搞選美不設年齡學歷界限，就算有紋身結過婚，個底花呢綠都無任歡迎。別論哪個平台最後選出較有質素佳麗，先講新聞話題，後者都贏了個馬鼻。

近年採訪港姐娛樂新聞，多得資訊發達，想做邊個熱門佳麗起底，在網上人肉搜尋，揭到陳年私密相唔在講，哪個男女關係複雜，哪個整容隆胸都無所遁形。於是新聞空間廣闊，大熱港姐A香艷照絕密流出；落選佳麗B豪放鎅四仔；出爐港姐C疑似割雙眼皮削腮骨，要幾震撼，有幾震撼。

早年互聯網未發達，為取得情報，娛記會混熟一些參選佳麗，由面試初選至最後殺入五強，邊個鍾意批踭搶鏡，邊個喜歡撩事鬥非，記者都可以清楚知道，特別是大會的行程安排，訓練細節，也可以預早掌握。

港姐宣傳，大部分移師海外，為拍得獨家新聞圖片，都不會選擇大會安排的包機票酒店住宿，寧願自掏經費。試過一次港姐在海外集訓，中午在落腳酒店，化好妝出席宣傳活動，招待來自香港的傳媒。記者未天光，已在酒店守候，希望拍到港姐們未化妝的真面目，沒精打彩食早餐，甚至烏眉瞌睡去集訓的樣子。

採訪港姐新聞，最驚險一次，是一次在大陸採訪。 話說某年有位賽前大熱，後來三甲不入，在電視台當姐仔的C佳麗，在參選期間不停招惹是非，鏡頭前經常騷首弄姿，批踭搶鏡。

記者等待她在國內四日三夜集訓宣傳，退出酒店房間離開後，潛入還未清理執拾的房間，竟然發現她食煙，遺下大量煙頭不特止，C姓佳麗仲留低用過的假眼睫毛、黐雙眼皮膠紙和多個用來裝胸作勢的水滴形nubra，佐證C姓佳麗「貨真價實」，冇整容、冇隆胸。

不過，期間記者險些走避不及，被前來執房的酒店服務員撞個正着，幸好他最後訛稱是佳麗助手，遺下了物品，才得以及時逃脫，萬一遇上酒店保安，甚至驚動公安就不堪設想。記者事後安全返港，還打趣苦笑說：「估唔到第一次大陸爆房，差點就俾人捉到應，打一身事小，返唔到香港就大鑊。」