為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 05 月 31 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

專業食家

民以食為天,但係真正要識飲識食,先至可以稱為「食家」。我就邀請到三位食家,擔任今次「Paco巨星飯堂」嘅嘉賓,李麗珊(Lisa)、區淑妍(阿Yo)同鄧曉霖(Rosina),係「有線高清娛樂台」節目《為食情報局》主持,佢哋食遍港、台、日、韓,夠晒專業!

我帶三位嘉賓去到位於灣仔嘅「Palco Ristorante」,用出色嘅意大利菜,挑戰三位食家嘅味蕾。

我帶三位有線電視《為食情報局》嘅主持Lisa、阿Yo同Rosina(左至右),去到位於灣仔嘅「Palco Ristorante」,以出色嘅意式風味,挑戰三位「專業食家」。

由於呢個逢周一至五晚22:30播出嘅節目,係以飲食資訊作主打,一眾主持包括Lisa(左)同阿Yo(右),都練成識飲識食嘅「功夫」,大飽口福。

極有口福

雖然介紹美食都係我嘅專長,但係今次有三名新力軍在場,我都想了解吓佢哋擔任「情報員」嘅得着。Lisa表示:「除咗可以品嘗到好多美食,仲可以去到一啲自己好想去試嘅餐廳,而且做訪問嘅時候,餐廳方面整嘅菜式係比平時更加好食,所以真係好有口福。

「最近我就訪問過另一間喺灣仔嘅意大利菜館,嗰度嘅老闆同大廚都係意大利人,我一試啲菜式,就覺得好有意大利嘅鄉村風味,個廚冇用太多花巧喺菜式上,咁樣反而更加凸顯到食材嘅原汁原味。」

阿Yo就話:「主持咗呢個飲食節目,令我多咗好多機會去捐窿捐罅,食到有特色嘅美食。我最鍾意食泰國菜,雖然啲菜式用料簡單,但係變化多端,嗰種辣味好有性格。」

最遲加入《為食情報局》嘅Rosina,都對主持飲食節目甚有感受。「餐廳會用最上乘嘅材料去炮製菜式,我自然多咗機會食好嘢。我同阿Yo一樣特別欣賞泰國菜,因為我好鍾意泰國菜用嘅香料,唔同嘅配搭都好有特色。」

墨汁炸蠔($128),外脆內鮮,零膩感。

鮮蟹肉牛油果番茄伴魚子醬($238),啖啖蟹香

慢煮三文魚伴法國龍蝦仔($238),三文魚嫩滑,配上鮮甜龍蝦仔,滋味無窮。

凍番茄清湯($68),以特別方法抽取番茄精華後,炮製出清新嘅清湯,令人一試難忘。

各主持喺社交網站推介自己嘅心水餐廳,盡顯飲食品味。

泰式推介

既然兩位主持不約而同地情傾泰國菜,咁就要佢哋同大家開心share,推介一啲出色泰國菜館。阿Yo話:「九龍城有一間叫『昭拍耶』嘅泰國餐廳,真係夠晒地道!老闆係一個好young嘅男仔,佢媽咪係泰國人,原本係開泰國雜貨舖,後來就變咗餐廳。嗰度嘅南瓜咖喱軟殼蟹好得,咖喱香而唔太辣,啲南瓜煮得啱啱好,軟殼蟹又香脆。另外仲有榴槤糯米飯,我好鍾意食榴槤o架,而嗰個糯米飯又落足料,我仲叫啲friend去食添!」

Rosina嘅推介就位於港島區,「我推介嘅『Issaya』就喺銅鑼灣嘅,係一間精緻嘅泰國餐廳。嗰度嘅豬頸肉咖喱麵,最有heart係佢哋用茶壺去裝個咖喱湯,而且仲用小爐keep住湯嘅溫度;味道亦都好得!而嗰度嘅甜品係另一大賣點,好多都係自家製嘅,我試過嘅有好香嘅奶茶macaron、大樹菠蘿雪糕,都好有特色嘅。」

雖然Lisa、阿Yo同Rosina(左至右)嘅口味各有不同,但係佢哋都表示通過主持飲食節目,獲益良多。

呢個海水炒意粉,鹽份源於海水,夠晒原汁原味,三位食家都大表贊同。

除咗精選餐廳同美食資訊,主持仲要落手落腳處理食材,體驗背後嘅故事,圖為另一主持黃芳雯(Paula)落田插秧嘅情況。

只此一家

哈哈哈!聽過兩位嘅泰菜推介,我就以今晚訪問嘅餐廳獨有嘅海水炒意粉,回饋三位食家。

菜式所用嘅海水,係每日限量運到、嚟自深海嘅海水,當中嘅鹽份係最天然、最原汁原味嘅。所以,只需用簡單嘅配料,就已經令人回味無窮。

Lisa最崇尚原汁原味,「呢個意粉嘅鹹味,同一般嘅唔同,但係好難用言語去形容,好特別!」

要令專業食家滿意,就梗係要花多啲工夫啦!

炒蘇格蘭蟶子皇伴香蒜泡沫($128),蒜香更能帶出蟶子味道。

慢煮黑松露法國黃油雞($398),慢煮令雞胸肉比雞髀更為嫩滑,值得推介。

日本黑芝麻二重奏($108),以黑芝麻製作出兩款甜點,各具特色。

海水炒意粉($398)採用經過特別消毒後,以真空包裝嘅深海水炮製,天然鹽份令意粉嘅味道更細緻,每日限量供應,要預訂先可以一嘗天然之味。

Palco Ristorante
地址:灣仔盧押道23號The Phoenix 2樓
電話:2618 8383