為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2016 年 05 月 25 日

火藥味最濃! 周庭、何君堯壓軸出場

ViuTV《跟住矛盾去旅行》最後一對壓軸嘉賓是有「學民女神」之稱、現任香港眾志副秘書長的周庭,「對戰」香港律師會前會長、建制派區議員何君堯。兩人大談六四、土地政治等時事議題,多次唇槍舌劍,火藥味甚濃。

周庭與何君堯到達東京前,已在前往機場的途中講起日本與香港政治上的分別。何君堯問周庭:「你知唔知佢哋日本有民主選舉,知唔知同香港差別有幾大?除咗特首問題?」周庭表示:「咁人哋成個國會都係選出嚟,但係我哋都唔會成個立法會係選出嚟。」然後兩人爭拗有關立法會是否存在「零票當選」的問題,周庭最後反駁:「咁呢個係唔合理囉,功能組別本身就係唔合理,有啲幾百票選出嚟,有啲幾萬票選出嚟,呢啲係幾咁不平等,咁當然你可能唔會介意啦,但我哋仲要喺香港生活多五、六十年,其實你去日本之前都可以wiki吓(網站《維基百科》)睇吓先。」何君堯隨即「黑面」說:「周庭,我唔係識晒咁多嘢,你知道幾多咪話比我聽,等我知道又會學習,當我細路仔咁囉。」氣氛甚為僵持。

兩人到了日本,在乘車期間又講起土地政策問題,周庭認為香港土地政策有問題:「地產商買地後會起好貴的樓,明明有好多囤積咗啲地,或者係空置單位又唔去處理。」又指現時香港好多人都面對這樣的情況,何君堯卻問:「有幾多到呢?」令周庭甚為氣憤:「點解何生你問得出呢個問題呢?其實呢啲嘢你係要比我清楚。」何君堯就答自己唔知:「咁我係香港人都唔知晒香港嘢,地球人都唔會知得晒地球人嘅嘢啦。」

隨後在參觀東京大空襲資料中心,兩人提起六四事件,周庭就問何君堯立場,何君堯指六四是悲劇:「我曾經講過一條人命損失都嫌多,我自己對六四嚟講學生的情懷係完全可以理解,但現實往往有時同我哋心入面諗有啲差距。」周庭認為何君堯未有正面回答,何君堯再堅持:「我已經答咗,『六四』如果避免就避免,係一個悲劇,當你睇歷史往往都會有人命損失。」周庭反駁指不應抱有雙重標準:「當我哋講日本必須面對歷史責任,中國都係一樣。 」令何君堯一度語塞。

到日本當地前,周庭(左)與何君堯(右)在前往機場的車程已經展開舌戰。

政見有異的周庭與何君堯多次唇槍舌劍,可算《跟住矛盾去旅行》最火藥味濃的一對嘉賓。

二人又大談歷史責任的問題,周庭的反駁令何君堯一度語塞。