為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 05 月 30 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

魯庭暉:不應滿足安於現狀

備受香港電視觀眾關注的ViuTv,開播以來成為城中熱話之外,其破格節目部署及貼市真人騷成功搶去不少慣性收視,ViuTv董事暨行政總裁魯庭暉(Lofai)續與陸叔暢談電視媒體這個平台,並同時給予有志入電視行業的年輕人一些分享。

陸:Lofai,我知你都去過好多唔同嘅地方做過嘢,點解揀返嚟香港做電視台?

暉:陸叔,我覺得香港係一個只要做得好,就會有人賞識嘅地方,因緣際會下我識咗PCCW嘅李生,發覺呢家公司嘅經營理念同自己非常相近,於是喺2010年就加入電訊盈科(0008),一開始我喺黃頁(Yellow Pages)度做管理實習生,負責一啲策略性嘅工作,當時發現印刷媒體行業廣告收入有一個下行嘅趨勢,於是我整咗個應用程式(app)重塑及部署廣告銷售(ad selling)。

陸:廣告銷售做得好係會直接影響到品牌嘅口碑同收入。咁除咗做過黃頁,你喺電訊盈科仲做過啲咩呢?

暉:我完成手頭上黃頁嘅工作後,就去咗電訊盈科旗下嘅Now TV幫手做節目,嗰陣我試過做好多唔同嘅崗位,令我明白到前線員工日常工作係咩嘅一回事,喺嗰度應用到嘅嘢好幫到我日後點管理ViuTv。

陸:即係話做完一個收費台,就過檔做一個免費台,咁你驚唔驚業務上會有衝突?

暉:兩個電視台係屬個別獨立媒體,目標觀眾群(target audience)亦都有唔同,ViuTv嘅觀眾會更廣泛,其實ViuTv個牌喺六年前已經入紙申請,未發到個牌之前我就已經入咗ViuTv做總經理,幫手處理開台前及後好多唔同嘅事務。

陸:有人話ViuTv最特別之處就係每個節目都有唔同嘅目標觀眾群,唔會整個「大雜燴」出嚟,你覺得事實係咪咁呢?

暉:ViuTv現階段係邊學邊做,透過好似經營廣告模式去摸索同提供唔同嘅節目內容,以唔同嘅節目內容去針對唔同嘅目標觀眾群,我哋最吸引人嘅地方,大概係可以為觀眾帶嚟新鮮感同畀到選擇佢哋,免費電視平台對觀眾嚟講可以講係鍾意咪睇下,我哋雖然係零點開台無包袱,但都有好大責任去做好呢個台。

陸:開台初時你哋就已經製作咗好多唔同種類嘅節目,有無諗點延續呢個氣勢同埋點維持穩定嘅收視增長?

暉:陸叔,維持收視呢樣嘢係無一條必勝嘅方程式,不過有晚我同阿媽食飯,佢就提起話有個新電視台嘅節目幾得意,我好少同佢講我工作上嘅嘢,佢亦唔知我有份做ViuTv。佢話有晚睇到有個蒙住面講變性人嘅節目都幾好,我一聽就知佢講緊「晚吹」,我當時真係無諗過會有個六十八歲嘅老人家鍾意睇呢個節目,所以你話新鮮感其實真係幾重要。

魯庭暉稱現時做ViuTv是新開台所以無包袱,可以是邊學邊做,希望可以為觀眾帶來新鮮感和更多選擇。

陸:哈哈,我有時應酬完返屋企都會睇「跟住矛盾去旅行」輕鬆下,我覺得除咗節目題材新鮮,你哋特別嘅地方就係每日都有唔同嘅節目時間表。點解當初你會有呢個部署?

暉:我哋設計節目時間表,就認為電視台應該要遷就觀眾,考慮方向都係以人類行為做基本出發,一般人係唔會日日坐定定喺度睇電視,如果電視每日都播同一樣嘅節目,有機會令追看嘅觀眾錯過某啲集數。就好似日本、韓國咁,佢哋嘅劇集都係一星期播一集,觀眾現階段可能未必習慣到呢個播放模式,但我哋會不斷微調,我相信觀眾日後都會慢慢適應。

陸:Lofai,不如分享下你嘅管理概念?

暉:陸叔,我哋係一個團隊創作嘅電視台,會繼續按需要去請新人,因為新同事通常會帶嚟更多創作靈感,我亦認為要畀到員工更大空間去發揮創意。我哋管理層可以做嘅,就係喺制度上去配合,同員工傾節目構思嗰陣,透過作出有建設性嘅回應去激發佢哋嘅創意,凡係有關節目內容嘅就應該放手畀番監製(producer)去安排。

陸:咁作為管理層你有咩地方想做得再好啲?

暉:我覺得做任何事都應該客觀啲,對任何人都要持開放嘅態度,我希望可以集結同事嘅潛能,喺人力資源上令佢地發揮到最好,協助佢哋喺財政預算範圍內,有責任地去做好啱觀眾睇嘅節目,我認為時刻都要保持喺飢餓狀態中(keep hungry),唔應該滿足已成功咗嘅現狀。

陸:籌備ViuTv開台你應該做得幾辛苦,有無咩支持你繼續做落去?

暉:對我嚟講做ViuTv成件事嘅意義好重大,從來無諗過會放棄,驅使我繼續做係希望做到一啲啱睇嘅節目畀香港觀眾多一個選擇。

陸:你認為年輕人想入行要具備咩條件呢?

暉:最重要係做自己鍾意做嘅嘢,唔好人云亦云,要問清楚自己o依家做緊嘅嘢,係咪自己想要做嘅嘢。

陸:喺我過去訪問嘅嘉賓當中,有好多位都一定講「鍾意」做先會想做。

暉:我覺得兼且要對自己誠實,年輕人先可以揾到真誠嘅答案。