為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人專訪 2016 年 05 月 21 日

坎坷過後有艇搭 梁佩瑚

八九年港姐季軍梁佩瑚,上月與細她一年的蒙古地產商人郭雲飛閃婚,在三亞舉行盛大婚宴,早前又在旺角酒樓補擺喜酒。「大家真係好夾,閃婚又有何干!佢仲想快啲,因為佢離咗婚,習慣咗有個太太喺身邊。」

以為梁佩瑚同丈夫會雞同鴨講,要學蒙古語溝通,她卻解畫:「佢去咗深圳發展廿幾年,識講普通話,但我普通話好差,所以佢話講廣東話就我,不過佢講啲廣東話好好笑。」

經歷過三次悔婚,又曾被騙做小三,情路上跌過重跤的她,家人和好友都以為四十七歲的她要獨身終老,但坎坷過後有艇搭,終被「蒙古大汗」收服,「我哋識咗一個月,佢就話我係結婚對象,個個都擔心我遇上老千。其實我都想結婚,但唔想生仔,佢話有個十三歲仔,唔會再生小朋友,要享受人生,於是大家一拍即合,拍拖八個月就嫁咗畀佢,我覺得o依家好幸福o架!」

梁佩瑚難掩新婚喜悅,常自稱是郭太,兩個月後將搬去新居的她,在舊居露台飲香檳慶祝,她搞笑說:「咁係咪叫告別姑婆屋呀?」

告別姑婆屋

單身多年的梁佩瑚,早已在元朗買下「姑婆屋」,叠埋心水與住在鄰近的胞弟梁焯皓老來相依為命,但上月結婚後,她已打算搬離姑婆屋,「新屋裝修緊,預計兩個月後入伙。」

梁佩瑚這段緣份,來得既急且快。去年八月,她的好友託郭雲飛駕車載她去深圳,會合朋友打高爾夫球,郭雲飛一見到她便心動,「佢全程大獻殷勤,又約我食晚飯,仲自動報告身世,話自己由小經紀奮鬥工作,做到成為地產商人,算係白手興家,前年離婚,有一個十三歲嘅仔。離婚後曾經同兩個90後嘅女仔拍拖,被苛索買名牌手袋。佢老實到得人驚,仲坦白話我知,當時我朋友(媒人)話介紹個四十幾歲嘅香港作家畀佢識,佢立即落閘嫌我老,話之前個女友係90後,今次最盡都要識個80後。

「嗰日佢車我去打波,初時唔知嗰個『老女人』就係我,係咁讚我好優秀,但最大缺點係年紀大,又話曾經見過我幅相,話我化妝個樣好得人驚……,之後就問我有無同人交往。初時我都怕畀人騙財,色我就冇乜o架喇,身邊朋友都擔心我遇上老千。」

梁佩瑚除向媒人朋友起他的底,又帶他逐一見家人和朋友,車輪轉測試其人品,結果獲一致好評過關。不過就輪到對方父母反對,嫌她年紀大,「好在我同佢哋兩老見完面,佢哋就好鍾意我,話我個樣好後生,又生得高。」

二人正式交往後,朝着結婚目標前進,男方更火速在海南島三亞酒店預訂酒席,再補做求婚儀式。講到求婚,她笑到標眼淚:「佢用普通話講『自己甚麼都沒有,只有「精蟲」,你不明白嗎?我可以「射」給你!』原來佢話只有『真誠』,可以『寫』畀我睇。」

上月24日,梁佩瑚在三亞舉行婚禮,不少親朋好友忍不住哭了,場面感人,她笑說:「佢哋見到我終於嫁得出,好開心,以後唔使再煩住佢哋。」

中港矛盾

真愛無界限,梁佩瑚不介意做蒙古少奶,她老實說:「如果我成日守喺香港,應該到更年期都冇得結婚。」她透露交往初期,是帶着矛盾去拍拖,首要去除對方的土豪味,「佢以前着衫好唔掂,認為買最貴嘅嘢就係最好,好似Gucci嘅大logo風褸,Hermes嘅H logo皮帶同埋loafer鞋,再加個LV包包,買五千幾蚊一條牛仔褲嗰種。之後我帶佢去Zara買過晒啲衫,佢問我『咁平得唔得o架?』點知佢啲朋友見到後勁讚,佢好開心。」

丈夫樂天又順得人,為了迎合她,經常深圳、香港兩邊走,連生活習慣都大轉變,原本每晚十時睡覺,早上七時吃早餐,變成每晚三更半夜至上牀,早上十一時才願起身,「佢想我身體健康,初時叫我一齊十點瞓,我話咁樣我哋感情唔會好,我係夜鬼,同朋友打完排球、食完飯都十一點,邊有可能咁早瞓?佢o依家成日陪我周圍去玩、飲酒,變咗凌晨三點至瞓。佢間中會返深圳住,同爹哋、媽咪七點鐘食早餐,都會話辛苦。」

梁佩瑚又大爆丈夫癖好:「佢好鍾意拎住部手機睇視頻,睇得好開心o架,原來睇緊獅子打架,啲狗打架,我唔覺得有乜好笑囉。我叫佢得閒睇吓書,莎士比亞好正,佢話都唔知講乜!」

燥底的梁佩瑚遇到溫柔的丈夫,總能輕易撲火,她想起與老公的生活趣事,笑得甜如蜜,「老公份人好開心,我好挑剔,佢話唔係人人好似我咁,叫我唔可以咁高要求。我連自己爹哋都夾唔到,而佢就好敬老,會帶我爹哋周圍去。我有時會秤,佢優點係乜,缺點係乜,最後發現佢嘅優點多過缺點。佢見我脾氣差,會叫我唔好成日生氣,要學忍耐。」

梁佩瑚個性率直、性格挑剔,不易相處,她的家人和好友們都私下提點郭雲飛,叫他要忍耐、遷就,不要企圖改變她,郭雲飛一句:「佢哋都好似覺得你好恐怖,點解我唔覺得你有問題?」這就是愛吧!

3卡的求婚鑽戒和婚戒,由她親自設計。