曾志偉 不醉無歸
曾志偉嘅哥哥曾志強月前喺台北病逝，據悉，佢嘅身後事全由志偉嘅前妻寶媽一手包辦。其實，曾志強喺一年多前已經被發現罹患血癌，直至一月初病情加重，吐血後就緊急送院，經搶救後，撒手人寰，志偉當然好痛心。
今年係志偉嘅六十三歲生日，佢每年生日都會大事慶祝，而且一搞就慶祝兩、三個禮拜。之前一直有傳志偉身體唔係幾好，但係冇辦法，佢朋友太多，所以喺生日會上面飲醉，基本上係例行公事，連啲朋友都話，佢唔醉先至係新聞。
日前，東姑有幸參加一班好友喺中環幫志偉搞嘅小型生日派對，見到朋友咁有心，佢點會唔開心；在場嘅曾國祥仲攬住老竇錫咗兩啖。香檳在前，加上氣氛熱熾，志偉一於飲咗先講；睇嚟佢亦都已經走出喪兄嘅陰霾。
一班好友喺中環幫志偉搞咗個小型生日派對，當晚仲有阿仔曾國祥喺身邊，佢開心到四萬咁口。
飲到情緒高漲嘅志偉，揸住支咪唔肯放，興奮講心中情。
