為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人專訪 2016 年 05 月 14 日

哪一天我們會飛 余安安

人生有幾多個十年?有人選擇用來為事業奮鬥,有人選擇逍遙享受,余安安就選擇用十年時間,做稱職人妻,放棄如日中天的事業,卻換來離婚收場,「所以話,人有得就有失!」

現年五十六歲的她,八三年閃電與周潤發結婚,婚姻只維持九個月便火速離婚;四年後,她下嫁第二任丈夫李萬祺,決定退出娛樂圈,相夫教女,但〇三年同樣離婚收場。

兜兜轉轉,余安安再次重返幕前,早前更憑舞台劇《最後作孽》首次獲得「最佳女主角」獎,對她而言,可算是一大肯定。

「我嘅人生好似有好多波折,婚姻唔係幾好,又有十年無出過嚟做嘢,但正因為我結束咗婚姻,先可以再出嚟工作,攞到呢個獎。如果唔係,我仲做緊煮飯婆!」

問到近年主力演舞台劇的她,會否掛念做電視台時的日子,她快速地say no:「o依家人大咗,寧願減少啲工作,畀心機將每一份工作做到最好,我相信一分耕耘,一分收穫。」

早前她憑舞台劇《最後作孽》首次獲得「最佳女主角」獎,獲好友劉嘉玲等人祝賀,並在網上感性寫道:「上天對我太好了,關了我一扇門,原來係會打開另一扇(窗)。」

最佳女角

不講不知,余安安原來已經入行四十年,她的大半生幾乎獻給娛樂圈,見慣大風大浪,對於獎項應該不再執着。不過,她笑指,得到舞台劇最佳女主角獎,是她入行以來最開心的一次。「我以前出道嗰陣,攞過好多咩十大最受歡迎獎,但實質真係關於演技嘅,呢個係第一個!」

效力過無綫,又過檔過亞視,視而優則影,連唱片都出過,余安安近年更撈過界,玩新意做舞台劇。「以前我拍電視、電影,唔係好享受,每日工作安排到密麻麻,我根本無辦法去enjoy份工,咁自然我唔會花心機去研究(個角色)。可能我已經離開(電視圈)太耐,我對電視已經無晒feeling,而且o依家啲電視質素認真麻麻,加上開工時間好長,我唔想要咁嘅工作模式。

「電影我都有keep住做,但你知香港都係偶像派市場,畀我嘅空間唔係太多,不如索性挑戰其他嘢,可能仲有滿足感。」

拍電影,余安安百分百是前輩級,但做舞台劇,她則是新手,演過三次舞台劇的她,大呼好大壓力。

「我每次演舞台劇都會瘦好多,因為舞台劇挑戰性好高,全部都係考你臨場反應,身心都要預先做好準備,尤其係演喊戲。以前我拍電視、電影,到最後正式拍,我先會畀真感情出嚟,但做舞台劇唔係,綵排嗰陣我已經要喊,每一日都要喊畀人睇,喊足幾十場,維持五至六個星期。」

為了令情緒長期維持於同一狀況,余安安可以去到好盡:「如果無咩必要,我就唔會出街, 驚染到啲感冒菌,因為病咗我都要繼續演,基本上每日起身綵排完就返屋企。而且我完全唔敢飲酒,半年前索性戒埋,因為我有好多對白要讀,思維要好清晰,唔可以畀自己有錯失。

「上一套(《遍地芳菲》)我演喊戲,其實無需要喊出嚟,因為套戲係講我走咗入房喊,但我為咗要連貫番個情緒,我入咗房之後真係自己一個喺度喊,搞到房入面嘅工作人員要遞紙巾畀我。哈哈,好nice!」

每年聖誕必與細女李文騫(左)和大女李文琪(右)到香港半島酒店慶祝,余安安稱:「每年聖誕去酒店食飯係我哋嘅傳統。」

去年十一月,余安安聯同其餘七位藝人於九展舉行《我的女神演唱會》,並唱出多首經典劇集主題曲。

余安安入行四十年,稱很欣賞影壇新人顏卓靈,但最想與「女兒」薛凱琪合演喜劇,「 我覺得佢喜劇細胞好好,我好耐無同佢合作過 ,《早熟》到o依家都十一年啦,好期待可以同佢演喜劇。」

做準岳母

開心事總是接二連三,今年年頭余安安於微博上宣布,現年二十八歲的大女李文琪即將與從事投資的男友Jeremy結婚,榮升成為準岳母,笑晒口的余安安,更大讚女婿是個good boy。

「暫時嚟講真係幾唔錯,佢哋拍咗拖兩年幾,拍拖無耐個女已經帶佢畀我睇,佢喺澳洲大,鬼仔得嚟又好有禮貌、好honest、好陽光、好鍾意講嘢,同我個女係一個好好嘅balance,我個女比較文靜。」

講到明唔恨抱孫的她,不介意女兒繼續過二人世界,更以過來人身份傳授婚姻相處之道。「我兩個(女兒與其男友)都有講,兩個人一齊最緊要係坦白,每個人都有短處,一齊耐咗一定會嗌交,唔好對方一做錯事,就只係focus喺嗰樣嘢上面,要諗吓對方嘅優點,啲事情就會好快過。」

大女李文琪與細女李文騫也長得亭亭玉立,不加入娛樂圈着實可惜。「千祈唔好加入!你估做藝人好易o架?尤其係做『星二代』就更加難!又有壓力、又要同人比較,你紅就話啫,半紅不黑嘅話,要做其他工都好難,我寧願佢哋做番普通人!」

但年輕女生,大概會對娛樂圈有好奇心吧。「佢哋睇見阿媽咁,確實係會有fantasy(幻想),所以佢哋細個嗰陣,我有畀佢哋接觸吓,帶佢哋去睇我拍戲。但係我好奸,我專帶佢哋去睇夜班,仲要係外景,好鬼凍嗰隻,去到半夜佢哋就話要走,哈哈!仲要多謝啲狗仔隊, 你知o依家啲後生仔好重視私隱,要無私隱嘅生活,真係咪搞!我要畀佢哋睇到華麗嘅背後,做藝人真實嘅一面,唔係真係咁靚!」