為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人專訪 2016 年 05 月 09 日

唯美獨尊 Zing

愛美,不是女士的專利,看星級化妝師Zing便可知一二。訪問這天,他除了以其一向至愛的Chanel衣飾現身,每拍一張相前,更例必與攝影師花上數分鐘,去研究如何擺出最自然、最美的甫士;拍攝後更立即查看相片,力求每張相出來的效果,也符合他的要求。

「我咁多要求,最終嘅原因都係想件事出到嚟靚啫!」

執着至此,難怪他能成為香港數一數二的化妝師之一。

來自新加坡的他,入行二十七年,出自他手筆的經典妝容有鄭秀文(Sammi)的「Nike眉」、王菲的「眼淚妝」等等,統統都讓人記憶猶新。堅持應有的執着,才能如阿Zing般創造經典;對美學的尊重,就是他屢創新妝的不二法門。

阿Zing坦言自己是個超愛化妝的人,以前每化完一個妝,例必追相先過追錢。「因為我要有自己嘅Portfolio,所以次次都緊張啲相多過錢。有次我唔見咗本記事簿,裏面有成四十幾萬數未寄單,幸好後來個的士司機送番本簿畀我。」

自學入行

訪問就在阿Zing於○六年開辦的化妝學校「ZING the makeup school」內進行,甚懂養生的他,手拿一杯石斛靈芝茶,開始暢談他的入行經過。「我當年冇真正去過化妝學校學化妝,只係自細屋企就有好多機會,畀我接觸唔同嘅藝術表演者。因為我爸爸係合唱團嘅人,而媽媽就係芭蕾舞員,而我當時亦有參與話劇同埋相聲(即兩個人一起合作的楝篤笑)嘅表演。唔知點解,當我唔使表演,就要負責幫其他人化妝,可能係咁,慢慢我就對化妝產生咗興趣。

「不過,當時我完全唔知做化妝師係咩一回事,又唔識人、點入行又唔知,就好似自己一個人喺荒島度咁,無人可問。但為咗要入行,人自然就會諗到辦法,就好似電影《火星任務》(The Martian)嘅荒島論一樣。我記得當年,每晚我都會去至出名嘅Club,目的係接觸唔同嘅Model,主動同佢哋傾偈,話我好想入行,可唔可以畀我試吓同佢哋化妝,o依家諗番起都覺得自己好娘!」

熱誠可以打動到人心,阿Zing就是一個成功例子。「經過幾次失敗之後,有一個黑妹Model肯做第一個畀我化(妝)嘅人,之後就一個Model傳一個,最終我就有機會跟一個新加坡化妝師正式學化妝!」

因為他對工作的迷戀及熱誠,最終打動了當時甚有名的雜誌編輯,找他與名模Janet Ma(馬詩慧)合作,自此他的化妝技術,便受到各界關注,成為他踏入化妝界的起步點。

阿Zing二十一歲時,便隻身從家鄉新加坡來港,「當時我完全無諗過,自己要留喺香港發展,只係諗住嚟香港一個月玩吓。點知我愈留愈鍾意呢個地方,因為呢度可以二十四小時工作,好適合我呢個工作狂。」

為了留在香港發展,他更苦學廣東話,「我真係好鍾意化妝,只要可以化妝我就好開心,我知道要在香港發展,一定要學識廣東話,我由零開始學到差不多流利,只係用咗一個月時間,目的就係為咗可以喺香港做化妝師。」

阿Zing與鄭秀文是相交多年的好友與合作夥伴,Zing歷年為Sammi化過不少獨特的妝容,如九六年經典的Nike 眉、○七年喱士貼的龍角眉等,讓人讚不絕口。

阿Zing除了是王菲,劉嘉玲及李美鳳的御用化妝師外,三人亦是他的好友,閒時會相約飯敍,暢談心事。

與星相處

勤力加上誠意,令阿Zing能成為一眾巨星的御用化妝師。他化妝的首個藝人,原來是甄楚倩,其後有湯鎮業前妻姜坤及車婉婉等。久而久之,就愈來愈多藝人找他化妝,談到他與一眾巨星的相處點滴,他認真地說:「我同Sammi(鄭秀文)可以講係合作無間,一拍即合,由佢推出〈Chotto等等〉呢首歌,第一次贏季選歌曲開始,我就幫佢化妝到o依家。

「而王菲,我記得第一次同佢化妝,係失手嘅,因為當時我用咗化妝師嘅心態,將我心目中覺得最靚嘅眉、最靚嘅眼線同最靚嘅嘴,全部放晒係佢塊面上,但出嚟嘅效果係錯晒,所以同王菲化妝,令我打破自己很多化妝嘅技巧。」

為與一眾巨星化妝,也許會感到一絲壓力吧。但阿Zing說:「完全無!真心講,我真係無諗過要化咩妝去迎合佢哋,我只係諗同佢哋化咩妝會令佢哋靚,我更加無諗過要用咩態度先可以去please佢哋。好似啲人成日話王菲好cool、好靜,但我就完全未見過佢呢個樣,因為我第一次同佢合作,我哋已經好多嘢講,可能我哋大家都唔係香港人,而且當時又啱啱嚟香港,可能呢個就係我哋成為好朋友嘅原因啩。」

見盡無數靚女明星,他覺得舒淇是靚爆的,「佢係一個化全妝即死嘅人!佢無論皮膚和五官都係好靚,我哋一定要識得欣賞佢嘅原始美,所以我好多次同佢化妝,都冇用粉底o架。」

原來替王菲和鄭秀文化妝前,他已替劉嘉玲化妝,「係我介紹王菲畀劉嘉玲識,記得最初人人都讚嘉玲好靚,但我一直都唔覺。直至第一次我同佢合作,見到佢嘅素顏,我先知道原來佢五官真係好靚,之後我就知點樣幫佢化妝。」

與阿Zing認識多年,在這個訪問中才知道他亦是一位專業的相聲表演者。

早年,為慈善出手的阿Zing,曾為楊千嬅創造了一個幽默復古look。

近年開始北上發展的他,坦言有意與內地藝人白百何和倪妮合作。