為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 05 月 09 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

Music Drinkers

我一向以酒會友,而今晚「Paco巨星飯堂」嘅嘉賓草蜢,就一向以好歌熱舞會知音。即使現今音樂市場流行數碼化,佢哋仍然有Heart推出國語大碟《Music Walker》,而且呢個心血結晶仲係製作經年嘅成品,點可以唔支持呢?

我就帶三子去到位於荔枝角嘅「大公館」,同佢哋一邊品嘗精緻嘅粵菜,一邊暢談製作大碟時嘅幕後點滴。

我帶草蜢三子:蘇老闆、阿智同傑仔,去到位於荔枝角嘅「大公館」,品嘗精緻美味嘅粵菜,細說佢哋最新推出嘅大碟《Music Walker》。

為咗將最完美嘅音樂獻畀粉絲,草蜢嘅大碟製作經年,要佢哋全員滿意先正式推出。

力臻完美

一坐低,蘇老闆(蘇志威)已經話:「Paco,今次呢隻大碟係我哋久違十九年嘅作品!」阿智(蔡一智)有默契地接話:「o依家仲出有十一首歌嘅大碟,證明我哋幾有Heart!」傑仔(蔡一傑)繼續接住講:「我哋三個仲包辦咗九首歌嘅創作,呢段創作過程真係好艱辛!」

哈哈哈!我認同o依家推出大碟係需要膽量同誠意,所以見到草蜢咁有Heart,就對背後嘅故事更感興趣。蘇老闆先解說:「本來隻碟係我哋諗住喺舊年,即係草蜢成隊三十周年,送畀fans嘅禮物,但係因為我哋自己寫番啲歌,加上mixing都想做到最靚仔先見人,所以後來就skip埋三十周年嗰樣嘢,不設時限。最終就到今年三十一周年,我哋先滿意,咁先可以拎出嚟。

「我今次只係貢獻咗一首歌,因為阿智話最好寫首歌關於自己嘅,我同周耀輝(填詞人)一傾,佢就寫咗我嘅性格落首詞度,首歌叫〈石頭記〉,係因為石頭比較穩重,呢首歌係我嘅solo歌。」

蘆筍龍蝦石榴果(三件$78),龍蝦肉鮮甜爽口。

清香柚子凍鮑魚(四隻$188),以泰國柚子加上柚子汁伴一口吉品湯鮑,清新開胃。

家鄉生拆魚蓉羹(每位$128),以新鮮星斑肉熬煮而成,配以甘筍、菠菜、木耳等全部切成幼絲,口感豐富,味道鮮甜。

今時今日仲咁有heart製作大碟,草蜢嘅誠意可嘉,而且質素又有保證,一定要大力支持。

一三年草蜢為周杰倫演唱會擔任嘉賓,後來周董就以歌「報恩」,為三子度身訂造一首快歌。

猛料外援

阿智即刻補充:「我同傑仔都分別寫咗四首歌,包括我哋各自嘅solo歌,我嗰首solo歌叫〈一二三四五六七八九十根指頭〉,係講家庭嘅。其實我哋今次出碟,主要係想向fans散播愛同埋快樂,每次我哋開show,完show都見到佢哋笑住返屋企,呢個滿足感係最大嘅。」

傑仔就話:「我哋今次仲有hidden track,即係total有成十二首歌o架!我寫嗰四首歌入面,包括o依家plug緊嘅〈大作〉,呢首歌有意思o架,係講每個人都可以係一個masterpiece,充滿正能量!

「另外仲有一首歌,係我寫畀我媽媽嘅,雖然佢已經唔喺我哋嘅身邊,但係佢都會喺我呢度(指着心口)。每首歌我哋連mixing都係自己跟,每一個音、每個groove,我都要攞得最精準。」

阿智即刻接住講:「不過我哋都有請外援嘅,分別係一個香港代表同一個台灣代表,台灣就係周杰倫,之前我哋為佢個演唱會做嘉賓,佢同我哋講,佢細個好鍾意聽我哋嘅歌,尤其係〈愛情森巴舞〉。所以今次佢就幫我哋寫咗一首快歌〈超猛〉,連負責rap嘅Matzka,都好有心思咁將我哋啲歌名串連落段rap入面,出嚟個感覺真係好正。」

傑仔話:「至於香港代表就係Ivana(王菀之),佢曾經幫我寫過一首〈上癮〉,佢嘅慢歌好得,今次佢寫嘅歌叫〈上天關了一扇門〉,由佢寫完到我哋做好,經歷咗兩年時間,佢仲要等到我哋出咗碟,先一次過聽晒,好有意思。」

三子都享受入廚樂,蘇老闆視之為親子活動,阿智就清淡為上,傑仔仲專程去泰國學藝,各有特色。

我同餐廳老闆Eric(右二)相當有緣,今晚又可以聚首暢飲!

我愛廚房

除咗音樂,草蜢三子對下廚亦好有心得,蘇老闆話:「我老婆先係屋企嘅大廚,佢煮嘅齋師承我外母,好得!o依家連我個女都學埋,有時食吓齋,人都健康啲。我就整甜品多啲,通常同個女一齊整,係一種好好嘅親子活動。」

阿智話:「我就簡單啲,煮少啲,只係食得比較清淡,唔使請客嘅話,我喺屋企蒸魚,連油都唔落,淨係落豉油。」

傑仔就直情去海外取經,「我去泰國學煮泰國菜,上堂嘅時候,有個同學唔知我係歌手,見我切材料切得好好,就以為我係廚師,哈哈!」

大公館稻草肉(每位$88),腩肉以啤酒及焦糖燜三小時,味道帶甜。

黃金沙律汁蝦球($248),將大蝦球炸至金黃色,沾上沙律醬及放在茄子上以作中和,伴以南瓜汁,香口而不油膩。

荷香魚翅蒸鴛鴦蟹飯($1,080),以原隻肉蟹及膏蟹炮製,米飯加入仿魚翅、蝦仁、燒鴨、雞粒、菜粒等炒香,蒸煮時再用荷葉包裹,味道更顯層次。

西班牙火腿米皇浸時蔬($178),以米漿代替傳統上湯,入口啖啖米香,頂層鋪上鹹香西班牙黑毛豬火腿。

脆米蒜香雞﹙半隻$218/全隻$398﹚,以香蒜醃製雞隻再用脆米風乾,炸至金黃,比炸子雞滋味更勝一籌。

大公館
地址:香港荔枝角長義街9號D2 Place 10樓A室
電話:2743 8055