組黨受阻 傳侯志強獨立出選

鄉事派組黨「新進步聯盟」一波三折，有村代表同本刊講：「侯志強早兩日同我哋講，組黨唔成無問題，佢會用獨立名義出選。」記者於是打畀侯志強求證，佢一聽到提問就答：「唔得閒，係咁啦。」然後收線。據佢身邊人講，侯志強可能為取消組黨成立典禮，搞到無乜心情。佢周日現身反水貨示威，都係企咗一陣就走。

侯志強之前猛話未收到新黨嘅公司同社團註冊批文，開唔到銀行戶口，無奈取消組黨所有活動，仲自爆畀咗十幾萬訂場地舉行典禮，無得退錢。佢遲些會去醫院同發叔交代組黨有阻滯。至於有無信心在九月立法會選舉前搞掂，佢就話：「一日已經變化好大，何況咁長時間？希望吉人天相啦！」

周日嘅反水貨活動上，受組黨阻滯困擾嘅侯志強高調「踩場」，有傳他會獨立出選新東。