為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2016 年 05 月 05 日

蔡堅掌二千票圖逼宮 史泰祖辭任醫學會會長內幕

醫委會改革方案激起千重浪,最終令醫學會大地震,震走會長史泰祖,令佢成為醫學會九十幾年來,首位中途辭職嘅會長,亦令醫學會兩派鬥爭問題白熱化。

據了解,醫委會廿八位委員當中,有七位係由醫學會會員提名,再由廿名會董揀入醫委會。上月史泰祖建議呢七人改為全體九千名會員投票選出。原定本周二討論是否就該建議進行「公投」。

「佢嘅建議明搶會董生殺大權,當然好大反彈,其中蔡堅反應最激烈。」消息人士說。據悉,蔡堅獲大部分會董支持佢「倒史」,更有人叫史泰祖「執包袱」,並計劃在本周二彈劾佢,逼佢辭職。

根據醫學會會章,廢除會長需要召開有幾百名會員出席嘅大會,獲過半數支持。由於蔡堅手握二千會員票嘅支持(大部分係普通科醫生),要罷免史泰祖並唔難。

史泰祖同本刊講,「我早已準備星期二遞辭職信,亦有諗過收回建議,點知蔡堅喺傳媒叫我執包袱,咁即係逼虎跳牆。」

史泰祖(小圖)突然劈炮,周伯展(前右三)及陳以誠(前右四)暫時代行醫學會會長職務,蔡堅(左一)否認逼宮。

史泰祖早已準備辭職,但沒料要提早兩日遞信。

盛傳史泰祖(右二)與蔡堅(左三)自政改爭議後不咬弦,兩人最近更為「公投」一事交鋒,史泰祖憤然辭職。

也有消息人士指,史泰祖覺得與其被人逼宮退位,不如自行辭職來得漂亮,「佢見形勢唔妥,自己辭可以贏到新晉醫生及社會支持。」

據悉,杏林覺醒、公共醫療醫生協會等組織早已不滿醫委會畀一班會董玩晒,所以好支持公投方案。甚至有傳「公投」方案係佢哋諗出來。「史泰祖自己唔選立法會,但佢想捧呢班新晉醫生入立法會,今次佢壯烈犧牲,無形中令業界醒覺醫委會問題,間接幫史泰祖派系嘅人催票。」

蔡堅則否認逼宮,「我向傳媒引述有會董叫佢執包袱,但我無逼佢走嘅意思,好好醜醜都想佢做到七月任期滿。」佢表示,同對方無過節,只係喺公投一事上有意見分歧。

不論係咪逼宮,有一點可以肯定咁講,醫委會改革方案勢令醫學界起風雲,「呢個係照妖鏡,醫生界嘅保守及激進派一照就現形,兩派相信有排鬥。」有業內人士慨歎說。