為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 05 月 02 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

貼地劇場

多一個免費電視台,觀眾就有多一個選擇,而且「ViuTV」嘅劇集《瑪嘉烈與大衛系列—綠豆》,仲有公認實力派林保怡(Bowie)同周家怡擔任男女主角,難怪播映以來嘅好評不絕,「Paco巨星飯堂」貼實時代脈搏,當然要誠邀兩位好戲之人擔任嘉賓!

劇集以對白、情節貼地,深受視迷讚賞,我就帶兩位主角,去到位於金域假日酒店嘅「龍苑中菜廳」,品嘗食迷會一見傾心嘅傳統香港懷舊風情,再細說劇集背後嘅精采趣事。

我帶Bowie同家怡去到位於金域假日酒店嘅「龍苑中菜廳」,品嘗傳統香港懷舊風情,細談佢哋為「ViuTV」拍攝嘅劇集《瑪嘉烈與大衛系列—綠豆》。

除咗Bowie(右二)同家怡(左二),劇集仲有另外兩位好戲之人廖碧兒(左一)同潘燦良(右一)。

友情大晒

今次劇集播出後,好評如潮,身為男女主角,Bowie同家怡都不忘歸功於同名原著小說,仲有編劇同兩位導演。Bowie話:「之前我一直喺內地工作,返咗香港之後,金廣誠(「ViuTV」製作部副總裁)約我食飯,仲畀咗本小說我睇,我平時睇書好少追睇落去,但嗰晚我一晚就睇咗廿幾頁,入面嘅情節、男女主角嘅對話,都好貼近現實,我睇得好舒服。

「之後佢話會將小說改篇成劇集,仲想我做『大衛』呢個角色,因為同金廣誠識咗好耐,而套劇嘅題材都好吸引我,所以我就接咗嚟演。」

家怡就表示:「我不嬲有睇原著,仲睇咗幾集網劇版,好似Bowie咁講,題材係好貼近現實,而編劇寫嘅對白都好生活化,觀眾會易啲有共鳴。」

餐廳由5月1日起提供「老香港傳統美食」,當中包括呢一道脆皮鮮奶伴腰果蝦仁($288),令食客可以一次過回味昔日嘅香港味道。

懷舊紙包骨($238)選用上等腩排炮製,經慢火炸過後,保持香嫩口感。

錦鹵雲吞($148)係另一道令香港人回味嘅懷舊菜式,炸得香脆嘅雲吞配上甜酸醬汁,夠晒開胃。

Bowie盛讚一向演舞台劇演得出色嘅潘燦良,話佢演技收放自如。

家怡話同湯怡(左)喺第一集嘅唱K飲酒戲份,雖然喺早上拍攝,但二人假戲真做,投入勁飲,只求做出真實感。

夠生活化

不論係劇集定係電影,能夠令觀眾有共鳴,就係好嘅作品。Bowie大讚導演:「第一日開工,我問導演攞劇本,佢話冇,因為嗰場戲係冇對白嘅,只係叫我搣橙,劇情就係講『大衛』搣橙畀『瑪嘉烈』食。我覺得呢個手法都幾新鮮,好生活化。」

家怡首日開工,就遇上截然不同嘅情況。「我要拍一場劈酒戲,因為劇情一開始係講我想同『大衛』分手。嗰日一早就開始拍,因為我哋想做一個真係醉酒嘅效果,所以我真係飲咗酒先拍,化妝係做唔到嗰種腫腫哋嘅效果。」

雖然Bowie同家怡曾經多次參演同一部劇集,例如《金枝慾孽》、《火舞黃沙》等,但係今次先係二人首次埋牙演對手戲,Bowie話:「家怡同我都係屬於同一類型嘅演員,就係好自然咁將演技同生活融合,所以我哋拍嘅時候,成日都會符合劇情咁爆肚。」

家怡有默契地即刻接住話:「係呀!搞到連啲crew都忍唔住笑囉!」

Bowie同家怡惺惺相惜,講到劇集拍攝過程時,二人有默契地爆肚演出,令情節更加「接地氣」。

我哋品嘗嘅傳統香港味道,由彬師傅(左二)悉心炮製,相當用心。

愛心素求

劇情以外,講到飲食之道,家怡就話:「我喺舊年八月開始食素,o依家只係食啲冇眼耳口鼻嘅動物,好似海膽、帶子嗰啲。食素唔係因為宗教關係,而係我喺網上睇到好多短片,覺得每一種動物都好有靈性,之後每食一啖肉我都好內疚,所以就直情食素。」

至於Bowie就相當隨性,「食嘢我會有啲精神分裂嘅,好似天使與魔鬼咁,天使嗰邊會叫我唔好食啲肥膩嘢,但係魔鬼嗰邊就啱啱相反。不過有時一班朋友食飯,就唔顧慮得太多,最多我食咗啲heavy菜式,就返屋企跑多啲步囉。」

雞蛋焗魚腸($238)嘅處理工序複雜,現已少有餐廳提供,更值得推介!

椒鹽百花鮮魷($138)相當惹味,精緻嘅刀工造出百花圖案,提供味覺以外嘅視覺享受。

東江炸大腸($168)予人肥膩嘅感覺,被配以嘅菠蘿中和,香脆嘅腸皮令菜式更具層次感。

桂花炒魚肚($188)爽口美味,係出色之作。

琵琶鴨($178)亦係香港買少見少嘅懷舊菜式,製作工夫繁複,要整得好似呢隻咁皮脆肉嫩,就更加有難度。

龍苑中菜廳
地址:尖沙咀彌敦道50號金域假日酒店低層1樓
電話:2315 1006