為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人專訪 2016 年 04 月 16 日

麥田上起舞 麥秋成

成功,需要天時、地利、人和,今年三十五歲的麥秋成,是另一個人辦。

自一一年擔任《狂舞派》舞蹈總監後,即廣為人知。他對工作的投入,令自己由眾星幕後的功臣,走到幕前;憑着熱誠建立屬於自己的「Neverland」,四年內開設兩間分校,名利雙收。

「我覺得不論做任何工作,只要你有熱誠、全情投入,就一定會有出路。如果你無熱誠,梗係處處死路啦!」

自信滿滿地跳着舞,他還稱若一心只想着錢,做甚麼都不會成功。聽在耳裏好像很過時,不過看看他舞出一片天,就知這個八十後藝術家,很有自己的一套。

除了參與演唱會和MV製作,麥秋成也曾在多部電影,包括《狂舞派》、《愛出貓》、《出軌的女人》中擔任舞蹈及動作指導,以多元發展為主。

近年蔡思貝不時傳出很多負面的新聞,身為男友的麥秋成也大方地在其Instagram內留言,隔空鼓勵。

一四年,麥秋成與蔡思貝秘密約會,其後二人的親密關係隨即成為傳媒追訪的焦點。

開腔護女友

認識麥秋成也是這幾年間的事,記得那一年是台灣金馬獎五十周年的大日子,我有幸參與這盛事,當時他就憑電影《狂舞派》獲提名「最佳舞蹈編排」,雖然最終失落獎項,但這部電影卻令不少人進一步認識誰是麥秋成。

近日,麥秋成這個名字再一次紅起來,但這次並不是因為他的工作,而是他跟港姐蔡思貝的緋聞。訪問在他位於西營盤的舞蹈學校進行,他穿上白色T恤,配襯牛仔褲波鞋,拍攝時擺出多個Chok甫,當談到與女友蔡思貝如何認識和現時二人的關係時,麥秋成半推半就地笑說:「我哋喺一個朋友嘅宴會上認識,之後佢確實係有跟我學跳舞,我哋嘅關係由朋友開始。所以當初被傳媒追訪,真係有啲壓力,真係好唔習慣!因為平時我同其他明星一齊出入,都唔會畀人影,同佢一齊就傳出呢啲嘢。

「我最記得當初我哋仲係朋友關係嘅時候,有次我車佢返屋企,撞正塞車,跟住失驚無神就有幾個記者,喺車嘅後邊好似飛虎隊咁衝上我架車前面,舉起相機狂影⋯⋯當時我真係被嚇呆咗幾秒,完全唔知發生咩事,不過o依家好啲嘞!個人學識咗放鬆同習慣。」

談到女友的花邊新聞多不勝數時,麥秋成坦言自己統統會一笑置之。他還首次開腔維護女友,大讚對方聰明和孝順:「其實佢轉數好快,係一個好有天份同努力的演員,希望大家可以畀多啲機會,同埋正面嘅能量佢呢啲新人啦。」

麥秋成坦言《狂舞派》票房勢如破竹,是他喜出望外的事,亦是他在工作上的一個成功轉捩點。

時裝到舞蹈

除了蔡思貝以外,談麥秋成就不得不提《狂舞派》。他為電影擔任舞蹈總監,而片中女主角,自小已經醉心舞蹈。他呢?並不是從小開始愛上舞蹈,而是於中學時候,看過師兄跳舞,他便對此「一見傾心」。「當年舞蹈室比較少,未有機會學習。直至入到大學,有師姐話我知有舞蹈學會(Dan-so),我就即刻參加。」由那天起,舞蹈和他便密不可分。

麥秋成於理工大學攻讀紡織及時裝設計,成績也不算差,不過開始跳舞不久,他便知道自己只會以舞蹈為終身職業。「我十九歲第一次喺學校表演跳舞,踏上舞台之後,就愛上呢種感覺。」

廿一歲畢業後,他沒有投身時裝設計行業,反而選擇了做舞蹈員,「我仍然好鍾意Fashion,但係喺娛樂圈工作,都可以接觸到大量同Fashion有關嘅嘢。而且我覺得自己老咗未必可以繼續跳舞,但就一樣可以做時裝設計師,所以我就決定趁後生,跳舞先!」

雖然做舞蹈員經常予人收入不穩定的感覺,但初出道的麥秋成卻十分幸運,「我一出嚟就可以為TDC(香港貿易發展局)嘅Young Designer Contest做表演嘉賓,之後就去紅館幫張柏芝喺《太陽計劃》裏面跳舞,跟住就同莫文蔚去咗上海做演唱會⋯⋯我無跳舞Job嘅時候,就有啲Model工作,所以我好感激所有幫過我嘅人。」

與麥秋成合作過的明星,多不勝數。「○五年我已經跟郭富城同劉德華排舞,之後有葉蒨文、林子祥、徐小鳳等,佢哋個個都好Nice。每個明星都有唔同嘅要求,加上個個嘅舞步都唔一樣,所以我每次同佢哋合作,都有唔同嘅壓力。

「例如小鳳姐,就千祈唔可以阻擋佢嘅視線;莎莉就非常之有主見,不過最緊張,都係同劉德華排舞,記得一○年,我哋為個MV《I Don't Wanna Say Goodbye》排舞時,佢一見到我,二話不說就叫我跳一次畀佢睇,我跳完之後,佢就即時行開唔出聲。當時我真係好驚,但原來佢係諗緊點跳,最後佢跳一次就OK,我真係好開心。不過,亦有啲新人手腳不協調,跳嚟跳去都跳唔到。」講到排得最辛苦一次,應該是為陳偉霆排《戰士》MV,「嗰次我哋排咗四十個鐘,因為佢想成首歌嘅舞步都冇重複位,所以真係諗到我頭爆,好彩最終出來嘅效果佢都好滿意,亦大受歡迎。」

一直視郭富城為偶像的他,一四年前往上海參與由浙江衞視主辦的大熱舞蹈節目《中國好舞蹈》,順利入選「郭富城隊」,演出多項精采舞蹈表演,獲城城盛讚。

他曾跟劉德華走遍世界各地舉行巡迴演唱會,後者還送上簽名海報給他作紀念。

十年前的伴舞員,現已成為炙手可熱的星級舞蹈名師。麥秋成教過的學生,包括任達華、毛舜筠、陳偉霆等。