為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 04 月 18 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

女拳當道

唔止命運,如果睇電視能選擇,我相信觀眾一定係最大得益者。隨住上個禮拜ViuTV開台,睇電視能選擇不是夢!其中格鬥真人Show《G-1格鬥會》,相當富話題性,所以今次「Paco巨星飯堂」,我就特別邀請到其中五位參賽者:唐紫睿(Hazel)、龍小菌、郭思琳(Margiela)、劉燕妮(Rika)同鄧洢玲(阿旦),聽吓呢幾位MMA女戰士嘅心聲。

我仲貼題地挑選咗位於銅鑼灣嘅「拳王泰國餐廳」,以泰式美食朝拜「女拳」!

我帶ViuTV新節目《G-1格鬥會》嘅其中五位參賽者:小菌、Margiela、Hazel、Rika同阿旦(左至右),去到位於銅鑼灣嘅「拳王泰國餐廳」,襯晒佢哋MMA女戰士嘅身份!

小菌、Margiela同Hazel(左至右)係身形較高大嘅參賽者,亦有一定優勢。

自我挑戰

一講到MMA(Mixed Martial Arts、綜合格鬥),唔少人會聯想到張家輝嘅《激戰》,即係剛陽味較濃,但係今次節目就搵咗八位美女,上擂台搏鬥,形成強烈反差。五位參賽者不約而同話:「今次參加呢個真人Show嘅演出,對我哋嚟講係一次挑戰自己嘅機會。」

賽前被視為奪標大熱嘅小菌話:「因為我本身有玩開kick boxing,而且身形上都有優勢,所以佢哋都覺得我嘅贏面會高啲。但係上到台打仲有好多因素要考慮,例如運唔運用到所學嘅招式,體能應唔應付到⋯⋯我試過個腦知道要舉高對手,但係我當時係做唔到出嚟。教練話當腎上腺素飈得太高,就會出現呢個唔協調嘅情況。」

身形苗條嘅Margiela就表示:「我係八個參賽者入面最遲確定參賽嘅,我決定參加嘅時候,距離要上擂台比賽只有一個月時間,我就即刻學巴西柔道同其他格鬥技術。

「第一場比賽,我嘅對手係Hazel,一上到擂台真係有啲怯,但係我知道點都要打o架嘞,於是就出盡力去打,打完我發覺自己雙手抽晒筋呀!同埋呢半年我成日發夢自己喺個籠入面(擂台),又要keep住睇物理治療同跌打,最慘係成日着運動衫,打交打到粗魯晒,身邊啲friend都當咗我係男仔。」

香辣蟹肉夜明珠($88),喺荔枝肉內釀入以泰式香料調味嘅蟹肉,味道層次細膩。

椰皇雞燉翅($268),每啖魚翅都帶有椰皇嘅清香同濃郁嘅雞味,值得推介。

泰式粉絲蟹煲($368),用上小肉蟹同大蝦炮製,集海洋鮮味於一煲。

高壓增磅

另一位高挑代表Hazel就話:「之前喺電影嘅演出,多數都係做一啲花瓶角色,參加呢個show就係因為我想自己另一面可以畀到觀眾睇。而打MMA係好危險o架,有機會會打死人,因為好多鎖技係專攻關節,可以啪斷手腳,鎖頸可以令人窒息死;踢到下顎、氣門、肋骨位都會有生命危險。我後尾都有啲抑鬱,每日沖涼都會忍唔住喊。」

最嬌小嘅Rika表示:「我係咁多個之中最輕嗰個,所以係受傷最多嘅一個,但我受咗傷都仲要去練,教練話咁先訓練到意志同體能極限。我成日記住佢(教練)話:『你輕一磅,出拳就會輕十磅。』我身形較蝕底,所以上到台好驚。

「我有試過增磅,但係因為當時壓力真係太大,就算我最高峰試過一日食五碗飯,都增唔到磅囉。」

眾女喺節目中拳來腳往,擂台上冇情講,受傷亦難免。

雖然喺擂台上打個你死我活,但亦為佢哋帶嚟新嘅友誼,喺飯敍呢一晚就可知一二。

餐廳老闆杜恆霖(Bryan、右一)係香港拳王,佢亦身兼Margiela嘅教練,睇得又打得。

全力以赴

阿旦對Rika嘅「壓力論」大表贊同:「我覺得精神壓力好大,成日都會發噩夢,時時刻刻都打緊交,又會無啦啦起腳,連我啲狗都嚇親。最搞笑係有次行街見到個人嘅步姿,跟住就心諗:咦,佢有弱點喎!就想一嘢『舂』埋去!」

喺第一戰期間,阿旦亦飽受喪父之痛。「當時爸爸啱啱患重病入咗醫院,我訓練完就即刻去醫院探佢,但係個腦入面仲係嗰啲格鬥技巧。到我去打,又會掛住爸爸,都好煎熬。」

拳王珍寶海鮮湯河($時價),選用足料一斤新鮮澳洲龍蝦加上其他海鮮炮製,配上冬蔭湯底,一流!

海南雞($138/半隻),特色係將冬瓜清雞湯倒進去骨雞件上,令雞更熱及更入味,令人回味無窮。

泰式炒金邊粉($138),加上一層蛋皮令金邊粉更具層次感。

椰皇焦糖燉蛋($88),巧妙地將泰、西特色混合嘅甜品,不可不試。

月亮蝦餅($138),以春卷皮夾手打蝦膠,香脆可口。

拳王泰國餐廳
地址:銅鑼灣謝斐道456-458號拔萃商業大廈地下至二樓
電話:3956 9384

下期預告

帶周柏豪及導演翁秀蘭品嘗特色日本料理。