為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 04 月 08 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

潘樂祺:做得多就會學得多

向以機電工程業務為主打的豐盛機電(0331) CEO潘樂祺(Rocky), 在八十年代中期曾受邀到澳門,全權打理一間與空調設備工程相關的公司,身經百戰的潘在機電工程界打滾多年,不但見證整個行業的轉變,更從多年實戰工作的經驗,重整改良配搭於其管理思維上。

陸:Rocky,你喺加拿大係讀機械工程,點解無留喺當地反而返嚟香港搵工?

祺:陸叔,我係喺香港出世,一路讀到去七三年考完會考之後,先去加拿大讀預科,之後就喺溫莎大學讀機械工程。七九年大學畢業,我揀咗同女友一齊返嚟香港搵嘢做。

陸:我知註冊工程師要拎牌,咁你係喺加拿大拎到個牌,定係喺香港拎到?

祺:我個牌係喺香港拎嘅,不過唔係一開始就可以註冊做工程師。七九年我返嚟做嘅第一份工係喺o依家集團嘅香港景福工程做助理工程師,做到八一年,就轉咗去另一間工程公司做顧問工程師。大概做咗三年,我又轉咗去一間空調設備供應商負責做維修工程,一路到八五年先爭取到註冊成為工程師。

陸:咁你拎到牌之後有無啲咩轉變?

祺:我喺拎到牌嘅同年,畀公司調咗去澳門,做嗰邊分公司嘅經理,一做就做咗四年。嗰四年可以話上咗人生好重要嘅一課,除咗學識點同員工溝通,仲學識點管理公司,當時我喺澳門就好似run緊一間小型公司咁。

陸:啱啱講喺七九到八九年呢十年期間 ,又有無遇到啲咩嘢令你覺得好難忘?

祺:哈哈,嗰十年應該係我人生最有得益嘅一段時間,我做過承建商、安裝、保養同銷售等好多唔同範疇但又相關嘅行業。喺澳門嗰陣學識點去管理公司,又學識點去培訓同行業相關嘅人才,仲要兼顧公司大小事務,對於我嚟講樣樣嘢都好新鮮,嗰時真係學咗好多嘢。

陸:要培訓人才係因為人手唔夠?

祺:嗰時澳門工程項目無咁多,八十年代機電工程行頭比較細,好多年輕師傅未必受過專業訓練,我哋專門派香港工程人員去教佢哋。

從澳門做到香港,潘樂祺見證了機械工程行業的轉變。

陸:咁係因為有客戶要求技術人員要受過專業訓練?

祺:主要係覺得有正統訓練嘅同事,做起上嚟會好啲唧。所以我哋同澳門大學合作,提供兩年相關嘅文憑課程,希望年輕人學以致用。

陸:當年喺工地做嘢,好多師傅都係「紅褲子」出身,係咪唔中意畀工程師教佢哋點做嘢?

祺:哈哈,我認為一個團隊入面,各人嘅能力同分工都不同,最緊要做好本份,每項工程前我一定事先向監工了解整個工序。

陸:係咪因為師傅覺得你哋工程師未必有落工地直接施工嘅經驗?

祺:坦白講師傅又真係有實戰嘅經驗嘅,不過身為承建商嘅我哋都要經常落工地視察,有咩磨擦大家都可以慢慢傾同溝通。

陸:我知你喺八九年返咗集團旗下嘅景福工程(澳門)做嘢,嗰時做過咩類型嘅基建工程呢?

祺:返咗集團之後,我幫手成立景福工程(澳門),最初借咗唔少香港嘅同事去幫手。我哋好榮幸參與咗海悅酒店、中銀大廈同機場等嘅基建項目,好開心攞到呢啲相當寶貴嘅經驗。

陸:聽你咁講,九十年代應該係你公司發展迅速嘅一段時間,當時係咪只集中跟澳門項目?

祺:隨着九二年鄧小平南巡,推廣中國市場開放,我哋都有跟新世界(0017)進駐武漢同中建三局喺武漢成立合資公司,將業務拓展到內地。由八三年開始,我哋秉承集團對外發展嘅策略,在中港澳及東南亞先後與中國內地、法國、日本、英國及葡萄牙的企業合作,喺唔同嘅地方成立聯營或合資公司開拓業務。

陸:○三年新創機電成立時,我記得你都有去過幫佢哋手,不如講吓當初點解會成立新創機電?

祺:陸叔,咁就要追溯返到九七年,在新創建成立初期,我由澳門被調職返回香港負責當時景福工程集團的業務,其後在二00三年接任由三家原新世界旗下的機電公司合併組成的「新創機電」為董事總經理。

陸:Rocky,你又係幾時加入豐盛機電?

祺:陸叔,我喺新創機電做到一一年,就加入咗豐盛機電,豐盛機電嘅母公司─豐盛創建企業係由新創建旗下多間公司重整再組合而成。

陸:不如講下呢個重組嘅方案吖?

祺:嗰時杜生(杜惠愷)同黃生(黃國堅)想用管理層收購(management buy out)方法,將幾間新創建旗下嘅公司私有化。豐盛機電就係豐盛創建企業旗下負責機電工程嘅公司,而豐盛創建企業仲有物業管理、保安服務、清潔等業務。因為見到發展空間大,就喺一五年尾將豐盛機電上市。又因應一帶一路嘅發展機遇,我哋想聯同內地嘅同行,借助上市攞到嘅手頭資金走出中港澳市場,參與醫院、機場、大酒店及會展等嘅機電工程項目。另外為咗配合業務發展,我哋希望收購到市場上有潛質嘅機電工程商減少外判。

陸:睇嚟你哋好積極爭取更多毛利率嘅機電項目工程喎。(待續)