為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 04 月 11 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

癲才無極限

要將才華喺癲狂嘅層面發揮極致,唔係人人都handle得嚟,但即將喺4月14號上映嘅電影《老笠》,就handle得恰到好處。除咗因為導演火火(李家榮)去得夠盡,仲有幕前一眾有實力嘅演員瞓身演出,有公認前輩級嘅緊哥馮淬帆壓場,戲味更加出晒嚟!

今晚「Paco巨星飯堂」,我就誠邀上述兩位帶隊,加上男女主角曾國祥(Derek)、J. Arie(雷琛瑜),同埋重心人物姜皓文(黑仔)同Eric Kwok(郭偉亮),去到位於香港萬麗海景酒店嘅「滿福樓」,歎住特色粵菜,細說呢部癲到黐線嘅Cult片鮮為人知嘅故事。

一次過同即將上映嘅電影《老笠》精英:Derek、J. Arie、緊哥、黑仔、Eric同導演火火(左至右)飯敍,大談呢部少見嘅港產cult片幕後趣事,夠晒暢快!

緊哥昔日多次同志偉喺《五福星》系列中合作(上圖),今次同Derek喺電影中交手,不論前輩定後輩都有特別感受。

廢青遇偶像

我一直都好想邀請緊哥擔任飯敍嘅嘉賓,今次適逢其會,終於可以同呢位德高望重嘅老行尊相敍。佢首先大談同火火嘅結緣:「最近呢六、七年,我都唔想拍啲胡鬧嘅喜劇,製片初初同我講呢部係喜劇,我仲第一時間就推咗。後尾佢同我講導演係火火,又畀我睇咗個故事大綱,我覺得好有意思,於是就接咗。

「我喺拍《五個小孩的校長》嗰陣識火火,雖然佢只係客串一個角色,但係佢演戲演得好自然,我有好深刻嘅印象。」

緊哥同另一位後輩Derek,就有好深嘅淵源:「以前同志偉拍《五福星》,但係我喺開工初期就真係唔知Derek係志偉個仔,佢話同我影張相send畀佢老竇睇,我仲諗乜佢老竇係我fans咩?」

Derek話:「我細個成日睇《五福星》,緊哥係我偶像嚟,所以當火火話請到緊哥飾演戲入面一個好有火氣嘅老人家嘅時候,我真係好興奮!而我就係飾演一個廢青,第一晚返便利店份工,又撞正老笠,引發一連串好癲嘅情節。」

叉燒($250/例),選用上等梅頭肉炮製,肥瘦適中,經過加上麥芽糖以秘方慢烤,令叉燒燒得均勻,每一片都帶有微焦嘅香味。

西洋菜陳腎煲生魚($280/窩),西洋菜有助下火,配合陳腎嘅香氣及鹹味,令湯頭鮮甜度大大提升。

杏香金沙龍蝦球($440/兩位),改良咗傳統黃金蝦的做法,以本地鮮活龍蝦代替鮮蝦,口感更鮮嫩彈牙,加入杏片令甘香度大幅提升,還夾雜了咸蛋黃的濃郁香味。

罕見港Cult片

電影被定為三級,預計嘅血腥、暴力固然在其中,故事以便利店作為現實社會嘅縮影,內裏人物性格鮮明。女主角J. Arie話:「我飾演一個平凡嘅香港女仔,即係港女,恨嫁又畀佢恨到,有富二代睇中佢要娶佢。但係就係因為畀人老笠,七個人困喺便利店一晚,困獸鬥嘅情況之下就改變咗佢一生,做咗一啲好癲嘅事。因為唔可以劇透,我只可以話成個concept仲癲過《死開啲啦》,觀眾睇完可以宣洩佢哋對現實嘅怨氣同不滿。」

睇咗部戲,我覺得電影係香港少有嘅Cult片,當中負責「黐線」嘅黑仔,畀我最深刻嘅印象,就係佢型着警察制服。「嗰套制服啲cutting好slimo架,搞到我連飯都唔敢食!因為我喺戲入面飾演一個叫『阿仁』嘅魔警,因為壓力令佢嘅情緒好唔穩定,所以就做咗啲黐線嘢。今次嘅角色設定好得意,而我又有機會去試新嘢,過足晒癮。」

Eric喺戲中飾演嘅風流大亨,同崔碧珈(下圖)飾演嘅角色有火辣演出,佢話事前已向太座報備。

黑仔飾演嘅「魔警」,表現亮眼,我仲覺得佢着上制服嘅造型,夠晒陽剛!

雖然電影場景僅為一間便利店,但係有咁有實力嘅演員投入演繹,出嚟嘅效果令人喜出望外。

導演去到盡

過足癮嘅仲有飾演大亨嘅Eric,「我喺戲入面要同Anita(崔碧珈)有好親密嘅scene,拍之前我已經同老婆備案,好彩佢嗰排心情好!初時拍都有啲尷尬,摸胸嗰場就NG咗六次,因為導演話我唔夠肉緊,仲將我當係Anita咁,示範畀我睇要點摸。

「今次飾演呢個大亨,加埋之前喺《有客到》飾演變態殺手,我已經實現晒十幾年前做Swing(Eric昔日組合)嘅時候,做訪問講自己夢想中演出嘅角色類型,所以you have to be careful of what you wish for!」

哈哈哈!講實現夢想,又點少得導演火火?「一開波我好驚,因為呢部只係我第二、三部做導演嘅戲,係Paco你同我講,叫我唔夠盡唔夠癲就唔好去搵你,加埋成班演員冇質疑過我,一齊去到盡,咁先實現到成件事!」

台式三杯焗桶蠔($320/例),選用美國的肥美桶蠔,先將桶蠔炸至乾身,再加入三杯汁料,令桶蠔吸收及融會三杯汁嘅味道。

蘭度百合炒斑球($460/例),蘭度即芥蘭,屬粵菜特有叫法;師傅選用5-6斤嘅大石斑製作斑球,令斑球軟滑又爽口。

柱侯蘿蔔燴牛尾($280/例),以柱侯醬炆炸過嘅牛尾五小時,令牛尾入口即化。

富中國色彩嘅甜品有蛋散($48/碟、前)同炸麻圓($48/碟、後),集香脆可口同煙靱於一身。

色香味俱全嘅甜品有楊枝甘露($60/位、前)、牛油果椰子雪糕($60/位、後),前者用呂宋芒炮製,後者就喺幼滑嘅牛油果漿中加入斑蘭,極具特色。

滿福樓
地址:灣仔港灣道1號香港萬麗海景酒店3樓
電話:28028888

下期預告

與MMA女戰將品嘗泰式滋味。