為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 03 月 31 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

王明凡:「看準目標,不斷突破」

中國香精香料(3318)成立二十六年,除了是國內行業的龍頭企業之一,也是率先通過ISO9001質量體系認證的中外合資企業之一。創辦人兼主席王明凡卻未打算就此止步,他有滿腹鴻圖大計,今期他續與陸叔闡述其營商策略及未來發展大計。

王明凡指香港背靠祖國已具備獨有競爭力,年輕人更應把握近水樓台的機會到中國創業。

陸:明凡兄,能夠帶領公司攀過一個又一個山峰,除咗係你哋搵到、又培訓到一班專業嘅團隊,你又係點留住呢啲人材呢?

王:陸叔,喺留住人材呢方面我哋做得非常好,喺公司做咗成十年以上嘅有超過七成員工。

陸:咁一定要分享下你哋留人嘅秘訣喇?

王:哈哈,香精呢個行業好特別,調香師無論做得幾出色,無咗專用嘅香精香料、團隊等協同效應下,去到另一間公司,未必發揮到最好嘅專業才能。每間香精廠都有自己獨有配方(formula)同調配系統,每隻配方亦有既定材料,佢哋好難走得到。加上公司一直盡可能畀佢哋最好嘅福利,好似我哋會補貼買車買樓咁,令員工知道公司係感激佢哋嘅貢獻。

陸:啱嘅,員工認同公司嘅文化又有歸屬感嘅話,佢哋肯留低嘅機會就好大。

陸:香精呢個行業本身嘅性質,可以幫到你哋避免畀其他對手高薪挖角喎,係咪算一大競爭優勢?

王:無錯,香精呢行唔係話有錢就做得到,比較少會有新嘅競爭者加入。我哋九一年開廠,花咗七、八年時間去培育人材,一定要打好基本工,先可以喺呢個行業站穩住腳。

陸:唔怕挖角,但又怕唔怕其他公司抄襲?

王:我哋呢行絕對唔會申請專利,因為申請完五年之後就要公開香精入面嘅成份,到時就真係畀人哋抄襲喇。香精配方成份非常複雜,我哋一日唔公開,其他公司都無可能抄襲得到,就算用機器去驗都比較難驗出100%。

陸:我知你哋最近宣佈收購咗電子煙嘅十大品牌之一、吉瑞(KIMREE Technology Co. Ltd.),呢次併購對中國香精日後嘅發展有咩特別意義?

王:主要係我哋有留意到現代人開始關注健康,電子煙絕對係未來時興嘅大趨勢。吉瑞本來係我哋嘅客人,雙方一路都有生意來往,佢哋負責設計電子煙,我哋負責調製吉瑞專用嘅煙草香精,賦予「靈魂」畀佢哋嘅電子煙,大家合作咗咁多年,我哋都叫做掌握到佢哋嘅要求同技術。

陸:咁呢次收購都可以講係有協同效應。

王:全球有成十億煙民,戒煙人數一路上升,所以我哋決定收購吉瑞,發展電子煙呢個附加增值。

陸:你哋對煙草香精方面有咩期望?

王:我哋o依家嘅市佔率大約係成半到兩成左右,喺煙草香精呢行其實有唔少公司都開咗成十幾年,佢哋有市場、有規模,之不過第一代做到咁上下想退落嚟,第二代又無心想接手,反而咁就畀到商機我哋向呢啲公司傾收購。目前仲有幾間同步進行中,不過唔講得住,要賣個關子先。

陸:咁你哋傾收購係希望喺市佔率提升上有幾多成目標呢?

王:好希望提升至三成市佔率,所以要加快收購煙草香精行業嘅力度。

陸:除咗提升煙草香精方面嘅市佔率,中國香精未來有無其他新產業嘅發展計劃?

王:收購吉瑞肯定係我哋發展新產業嘅第一步,食電子煙時吸入同噴出嚟嘅「煙」係透過霧化技術產生,我哋想透過呢個原理,研究一下可唔可以將啲藥品霧化,以作治療之用,我哋o依家同深圳一間知名嘅醫療企業傾緊合作。

陸:我以為呢種技術係一直都有嘅?

王:技術係一直都有,就好似哮喘嘅吸入器咁,不過嗰款吸入器好笨重,我哋想設計到有電子煙嘅外型,又附有哮喘吸入器嘅功能,希望再深入研究霧化技術喺醫療方面嘅應用。

陸:咁你嘅成功之道係咩?

王:年少就同家人一齊創業,初時的確經歷好多艱難,由做貿易生意到開廠做生產商,上市之後企業就由家族式管理走向規範化管理,當中嘅轉變唔係易事。上市固然為我哋帶嚟好多好處,令公司添上持續發展嘅競爭力。個人而言,我靠嘅係信心同耐心,不過未去到退休嗰日,都唔敢講自己係成功人士,哈哈。

陸:明凡兄,我一直都想問點解國內有咁多企業嘅掌舵人都對國家心存感激?

王:中國由市場開放改革開始,好多國內大企業都同國家攜手同步成長,呢啲國內企業嘅掌舵人包括我,時時都好感恩有賴國家嘅扶持。

陸:咁你覺得現時中央政策對香港有無帶嚟咩實際效益呢?

王:香港自回歸以嚟,經歷過金融危機、沙士等難關,都能夠一直保持繁榮穩定,中央喺當中畀咗好大力度嘅支持。

陸:雖然遇到「艱難」,但呢樣嘢又往往令人付出更多嘅努力,去爭取更大嘅回報喎。

王:香港背靠祖國已經係獨有嘅競爭優勢,我覺得香港嘅年輕人應該利用呢個近水樓台嘅特點,視祖國作為人生發展嘅平台,不妨返內地試下做開荒牛創業,但大家必須緊記喺前進嘅過程中,心最好保持同處於開放狀態先得。