為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2016 年 03 月 31 日

Bob食福無邊

林盛斌(Bob)近排「升呢」做電影男主角,喺「旺角活地·阿倫」葉念琛導演嘅新戲《我要發達》裏面,仲不知幾好艷福!劇情話佢發咗達之後,好多靚女投懷送抱,其中之一就係TVB藝員孫慧雪(阿雪)。早排,阿Bob仲晒命,喺社交網上載佢同阿雪喺片場嘅親密合照。一身麻甩猥瑣造型嘅阿Bob,旁邊係谷行「咪咪」,打開心口展露深不可測「事業線」,造型十足日本AV女優嘅阿雪;而阿Bob就抵死留言稱對方係「波多野雪雪」添,認真恨死好多宅男!

除咗好艷福之外,阿Bob更加有食神,咁好彩導演搵嚟玄學家麥玲玲,做佢戲入面嘅老婆。阿Bob都有上載自己同睡衣look嘅玲玲合照,仲講笑話對方係「波多野玲玲」。不過,最引人流口水,都算係玲玲豪請大家食⋯⋯一煲大大隻嘅鮑魚做消夜。東姑聽聞成煲四十隻廿頭鮑魚,大嗱嗱三萬幾四萬蚊,分分鐘貴過玲玲啲片酬,認真和味喎!

東姑都有問番玲玲,佢就話:「同導演、阿Bob都係老友,拍戲更加唔係志在片酬,見大家拍通宵咁辛苦,所以請食豪啲囉!」想有食福,各位監製、導演不妨搵玲玲多啲容串吓!

喺葉念琛導演嘅新戲《我要發達》裏面,阿Bob同玄學家麥玲玲飾演夫妻。

阿Bob攬住着睡衣、頭上仲有兩個髮卷嘅玲玲合照,仲笑稱對方係「波多野玲玲」添!

同玲玲拍戲認真有食神,佢竟然請食二十頭鮑魚做消夜,一煲要成三、四萬蚊。

阿Bob口中嘅「波多野乜乜乜」,其實係指近年迷死唔少港台宅男嘅日本AV女優波多野結衣,素有研究AV嘅阿Bob,當然瞭如指掌。

阿雪打開心口露「事業線」,造型似足AV女優,阿Bob居然幸福到同佢拍對手戲,恨死好多宅男啦!